اسلام آباد۔ 27 ستمبر(اے پی پی) صدر مملکت ڈاکٹر عارف علوی عئید میلا د النبی ﷺ نا وخت آ بندی تا سزاتیٹی 90 دے انا کمتی نا منظوری ءِ تسنے۔ چارشنبے نادے آ ایوان صدر نا پریس ونگ انا رداٹ صدر مملکت سزاتیٹی کمتی نا منظوری آئین نا آرٹیکل 45 نا رداٹ تسنے۔ سزاتیٹی کمتی نا اطلاق خون، جاسوسی و ریاست مخالف سرجزآتیٹی اوار بندی تیا مفک، سزاتیٹی کمتی نا اطلاق زِنا، دُزی، داڑیلی ، برمتہ و دہشت گردی ٹی سزایافتہ ڈوہدار تیا ہم مفک۔ سزااٹی کمتی نا اطلاق مالی ڈوہ و قومی خزانہ ءِ نسخان تروک آ ڈوہدارتیا ہم مفک۔ سزاٹی کمتی نا اطلاق درملکی بندغ ایکٹ، 1946و منشیات کنٹرول (ترمیمی) ایکٹ 2022ء نا رداٹ سزایافتہ بندغ آتیا مفک۔ 65 سال آن زیات وئی نا نرینہ بندی ہرا تینا اسہ تہائی بندی ءِ کاٹ کرینو اوفتیا اطلاق مریک۔ 60سا ل آن زیات وئی نا زالبول بندی ہرا اسہ تہائی قید کاٹ کرینو، اوفتیا ہم سزاٹی کمتی نا اطلاق مریک۔ 18 سال آن کم بندغ ہرا تینا اسہ تہائی سزا ءِ کاٹ کرینو اوفتیا ہم سزاٹی کمتی نا اطلاق مریک۔
