اسلام آباد۔ 27 ستمبر (اے پی پی) نگران بنجائی وزیر انفارمیشن ٹیکنالوجی وٹیلی کمیونیکیشن ڈاکٹر عمر سیف پارینے کہ حکومت فری لانسرز نا آسراتی کن ای ورکنگ سینٹرآتا جوڑ کننگ کن اسہ لکھ آن اِرالکھ روپئی اسکان بے سود وام فراوان کیک۔ میڈیا تون گپ وتران کرسا تدوک آ دے او پارے کہ حکومت ای فری لانسر سینٹر جوڑ کننگ کن ہرفری لانسر ءِ 100,000وخت اس کہ ایلو زر اگہ المی مس تو فری لانسر نا کنڈآن تننگک۔ اونا خیال ئس کہ ہر فری لانسرسالانہ 25000آن 3000ڈالر کٹیا کیک و نیشنل ایکس چینجر اٹی بھلو بشخ اس شاغک۔ اوپارے کہ دا گام گیج آن آئی ٹی سیکٹر نا برآمد آتیٹی 3 بلین ڈالر نا ودکی مریک۔ مستی پاننگاکہ حکومت آئی سٹارٹ اپس کن وام تسکان آسان رسینگ و زرکاری کن ہم گام گیج کننگ ءِ ہرانا سوب آن بروک آ شش تُو اٹی اسہ ارب ڈالر نا پیشن نا زرکاری گمانی ءِ۔ تعلیمی منظرنامہ غا گپ وتران کرسا ، وزیر انکشاف کرے کہ پاکستانی یونیورسٹیک داوخت آ20,000آن IT 22,000گریجویٹ تیار کرینے، ہرافتیان بیرہ 2،000 آن 2،200 تون ملازمت ءُ۔ اومہارت آتیٹی تفاوت نا ذکر ءِکرے، ہرا گیشتر جہانی آب آن کم مریک۔ دا مہارت نا پرخ ءِ پُر کننگ کن، اوپاکستانی آئی ٹی ماہر ین و یونیورسٹی تا نیام اٹ کمکاری نا گرج آ زور شاغا۔ ڈاکٹرسیف سلاہ پیش کرے کہ چندی آئی ٹی کمپنیک پیشن نا ملک فنڈ چلیفرہ ہرافتیان اسہ قابل ذکر زر اوفتے آسودہی ترسا پاکستان آ پدی گدریفنگ مریک۔ نگران وزیرنا رداٹ ، دا آسودہی تیان ملک ءِ ممکنہ وڑاٹ 1آ ن 2 بلین ڈالر ودکی ملنگ کیک۔
