اسلام آباد۔ 27 ستمبر (اے پی پی) پاکستان اٹ امریکہ نا ڈپٹی چیف آف مشن (ڈی سی ایم ) اینڈ ریوشوفر پشاور نا اِرادے ئی دورہ ءِ کرے، دانا مسخت سیم تا رکھ انا چرجوئی ٹی امریکی عزم انا پوسکنی و خیبرپختونخواٹی سیم پار دراندازی نا توننگ و عسکریت پسندی نا برخلاف جنگ اٹی پاکستان کن امریکی مخ تفی نا درشانی ءِ کننگ ئس۔ ڈی سی ایم شوفر تینا دورہ ٹی تاریخی قلعہ بالاحصار اٹی فرنٹیئر کور ناانسپکٹرجنرل تون اوڑدہی کرے و داٹی او نن نا تاریکی ٹی آپریشن نا کاریم نا کچ اٹی ودکی کن ایف سی کن دونیم لکھ ڈالر نا اسہ ڈٹ اس بناکننگ نا پڑوکرے۔ ڈی سی ایم شوفر آئی جی پولیس اخترحیات تون ہم اوڑدہی کرے و مسہ نیم لکھ ڈالر مالیت نا رکھی و سیکورٹی گڑا اوفتا دوٹی تس، دا ازباب آتیان دہشت گردی نا برخلاف مہیب خطرہ غاتون مون تننگ کن پبی کارروائی تیٹی پولیس فورس انا رکھ و کارکڑد اٹی ودکی مریک۔ ڈی سی ایم شوفر خیبر پختونخوا ٹی پوسکن اوار مروک ضلع غاتیتی زند و روزگار اٹی گچینی اتنگ کن یوایس ایڈ نا کمکاری اٹ برجاچار لکھ ہفتاد ہزار ڈالر مالیت نا پروگرام آن فائدہ ہرفوک آ ورنا، زالبول، اقلیت و خصوصی بندغ آتون اسہ گول میز کانفرنس اسے ٹی ہم بشخ ہلک۔ ہندی آبادی نا گرج آتا رداٹ ڈی سی ایم شوفر ہموڑے سلائی مشین و شمسی توانائی آن چلینگوک آ پنکھا بشخا۔
