حاجی تا آسانی کن لائیو موبائل ایپ اس تیار کننگک، نگران وزیرمذہبی امور

اسلام آباد۔ 27 ستمبر (اےپی پی) حاجی تا آسانی کن لائیو موبائل ایپ اس تیار کننگک ہرانا کمک اٹ غٹ سرجم آتا دوئی کننگ و ٹریننگ مننگ کیک۔ داہیت ءِ نگران وزیر مذہبی امور انیق احمد وزارتِ انفارمیشن ٹیکنالوجی نا وزیر عمر سیف تون اوار اڈ ہلوک دیوان اٹی پارے۔ وزارت نا ترجمان نا رداٹ دیوان اٹی وزارت انفارمیشن ٹیکنالوجی نا کمک اٹ حج آئی ٹی سسٹم اٹ گچینی و اصلاحات اتنگ آ امنا کننگا تانکہ حاجی تے گچین آن گچین آسراتی و غاوتا پوروی نا نظام ءِ ترند کننگے۔ دیوان اٹی پنجاب آئی ٹی بورڈ، نیشنل آئی ٹی بورڈ و وزارت مذہبی امور نا ایڈیشنل سیکرٹری ، جوائنٹ سیکرٹری حج و حج آئی ٹی سیل انا نمائندہ غاک بشخ ہلکر۔ وزیر مذہبی امور انیق احمد پارے کہ او حج آپریشن ءِ پورو ڈیجیٹلائزڈ و اینڈ ٹو اینڈ پیپرلیس کننگ خواہک۔ غٹ حاجی تا آسانی کن لائیو موبائل ایپ اس تیار کننگک ہراٹی غٹ سرجم آتا دوئی کننگ و ٹریننگ ممکن مریک۔ سعودی عرب اٹی حاجی تا ہن و بر و مالیاتی نظام کن کمپیوٹرائزڈ نظام اس جوڑ کینہ۔ نجی حج گروپ نا مینجمنٹ انفارمیشن سسٹم ءِ پین فعال کننگک۔ وزیر انفارمیشن ٹیکنالوجی عمر سی باوری کرفے کہ حاجی تا گچینی کن وزارتِ آئی ٹی تینا پبی کمکاری ءِ ایتک۔ اوپارے کہ نیشنل آئی ٹی بورڈ ساڑی آ حج انفارمیشن سسٹم نا سرجم جاچ آن پد گچینی نا سلاہ ایتک۔ وزارت آئی ٹی حج انفارمیشن سسٹم ءِ مربوط کننگ کن چاہندار آتا ٹیم مذہبی امور اٹ تعینات کیک۔ این آئی ٹی بی و پی آئی ٹی بی نا سٹیئرنگ کمیٹی سسٹم ڈویلپمنٹ آ پیش رفت ءِ پک کیک۔ پوسکن آ حج انفارمیشن سسٹم نا پیش رفت آ وزارتِ آئی ٹی  ٹی ہفتہ وار دیوان اس اڈتننگک ۔