راولپنڈی۔ 27 ستمبر (اے پی پی) منشیات تور فورس (اے این ایف ) منشیات اسمگلنگ نا برخلاف کریک ڈاؤن اٹی 5 کارروائی تیٹی 118 کلوگرام آن زیات منشیات دوئی کرسا 4 دوبہ دار ءِ دزگیرکرے۔ اے این ایف ترجمان نا رداٹ جناح انٹرنیشنل ایئرپورٹ کراچی آ درملکی زالبول اسے نا پڈآن 86 کوکین آن پُر کیپسول دوئی کننگا۔ دوئی کیپسول آتیان 1 کلو گرام کوکین دوئی کننگا۔ ہندا زالبول دے ٹکی افریقہ نا ملک برونڈی آن کراچی آ سرمسوسس۔ شکارپور سکھر نا خڑک قمبر شہداد کوٹ نا ہنکینی دوبہ دار اسے آن 7 کلوچرس دوئی کننگا۔ رنگ روڈ پشاور آ گاڈی نا اودیم خانہ غاتیان 24 کلوچرس و 18 کلو ہفیم دوئی کننگا۔ داوخت آ نارووال نا ہنکینی دوبہ دار منشیات اسمگل کننگ نا کوشست آتیٹی دزگیرکننگا۔ واپڈا ٹاؤن لاہور نا خڑک کارروائی ٹی نجی کوریئر کمپنی نا مالک ءِ دزگیرکننگا۔ دوبہ دار نا گاڈی ٹی ساڑی پارسل آن 3 کلو 612 گرام آئس دوئی مس۔ آئس آتے مہارت اٹ پی آرسی پیپ آتا فٹنگ اٹ اودیم کننگاسس۔ دوبہ دار پیشن نا ملک منشیات اسمگلنگ کن اسمگلر آتے آسراتی فراوان کننگ نا اعتراف کرے۔گوادر نا غیر آباد علاقہ ٹی اسمگلنگ کن اودیم کروک 65 کلو چرس دوئی کننگا۔ ترجمان پارے کہ دوبہ دار آتا برخلاف منشیات تور ایکٹ نا رداٹ مقدمہ درج کرسا مستی جاست وپاست نا بناءِ کننگانے۔
