پاکستان وتواجہ مملکت اسے نا حیثیت اٹ تینا قومی فائدہ ٹی فیصلہ کیک، کس اسے تینا باندات آتیٹی نیام تمنگ کن اِلیپنہ، نگران وزیراعظم انوارالحق کاکڑ

اسلام آباد۔ 26 ستمبر (اے پی پی) نگران وزیراعظم انورالحق کاکڑ پارینے کہ پاکستان اسہ آجو و وتواجہ مملکت اسے، نن تینا قومی فائدہ غاتیٹی فیصلہ کینہ، کس اسے تینا باندات آتیٹی نیام تمنگ کن اِلیپنہ، باور کرفیوہ کہ گچین کاری عمل ساف و شفاف و آجومریک، نن زوت گچین کاری عمل اٹ پترینگ انگ والااُن، گچین کاری عمل اٹ انتظامی کہول آ کس اسے نا مخ تفی یا مخالفت ءِ کننگپک، اوغانستان اٹی سوگوی ہڑتوم آملک آتا فائدہ ٹی ءِ، تحریک طالبان پاکستان تون اوار ایلو گروپ آتا پاکستان نا برخلاف اوغان گل زمین ءِ کاریم اٹ اتنگ آ گڑتی ءِ، اوغان عبوری حکومت تینا گل زمین ءِ اسہ ملک اسے نا ہم برخلاف کاریم اٹ اتنگ کن اِلپ، ترک ٹی وی ’’ٹی آرٹی‘‘ ءِ انٹرویو ٹی نگران وزیراعظم انوارالحق کاکڑ اسہ سوج اسے نا ورندی ٹی پارے کہ نن تحریک انصاف، مسلم لیگ (ن) یا پیپلزپارٹی تون اوار ہرسیاسی جماعت نا سیاسی حق انا رکھ ءِ پک کینہ۔ ہراتسکان پرامن برانز نا تعلق ءِ تو او ہر اسٹ نا حق ءِ ولے پرتشدد برانز ءِ اسُل منپنہ۔ اسہ سوج اسے نا ورندی ٹی اوپارے کہ گچین کاری حلقہ بندی الیکشن کمیشن نا آئینی زمواری ءِ۔ اگہ نن کانود نا بالادستی نا ہیت ءِ کینہ تو ننے داڑآعمل ہم کروئی مریک۔ گچین کاری حلقہ بندی تیا اعتراض مسکوہی پارلیمنٹ اٹ کانود سازی نا وخت آ کننگ مسکہ و ہندا اونا درست فورم ئسک۔ ننے کانود و آئین نا پاسداری ءِ کروئی  ءِ۔ اگہ آئین ننے پوسکن آ حلقہ بندی تا پاہک تو الیکشن کمیشن پوسکن آ حلقہ بندی کرفنگ نا پابند ءِ۔ اسہ سوج اسے نا ورندی ٹی اوپارے کہ پاکستان تون اوار ہر ملک انا سیاسی کلچر اٹی سازشی تھیوری گردش کرسا کیک۔ اوپارے کہ عمران خان نا حکومت ءِ اینک کننگ نا بابت نیام تمنگ نا دوبہ غاتا تینٹ امریکہ دوٹوک تردید ءِ کرینے۔ گڑاس وخت سیاست دان السی مخ تفی دوئی کننگ کن داوڑنا موقف ءِ تینا کیرہ۔ اوپارے کہ نن اسہ وتواجہ قوم اسے اُن۔ داہیت ءِ پک کینہ کہ اسہ ہم پیشن نا واک اس پاکستان نا اندرونی باندات آتیٹی نیام تمپ۔  تینا فائدہ غاتے مون آتخنہ،  پی ٹی آئی نا تدوک آ حکومت ءِ اقتدار آن جتا کننگ نا بابت نگران وزیراعظم پارے کہ آئین اٹ حکومت اسے نا جوڑ کننگ و اینک کننگ نا بابت وڑوڈول نوشتہ ءِ، پاکستان نا پارلیمانی تاریخ اٹ اولیکو وار داکاریم کن آئینی کسر ءِ اختیار کننگا۔ ہنداسو ب آن دا مچ آ عمل آئینی ئس۔ اسہ سوج اسے نا ورندی ٹی اوپارے کہ بدبختی اٹ مسہ چار دہائی آن ننا سویلین ادارہ غاتا کارکڑد جوان متنے۔  جان جوڑی، تعلیم، خراج وصولی یاقدرتی آفت آتون مون تننگ تون اوار چندی بشخ آتیٹی کارکڑد نا بابت ننے چیلنج مون تروک مسنے، و ننے مجبورا فوج کون آ منظم ادارہ غان کمک طلب کروئی تمک۔ اوپارے کہ گورننس تون اوار تینا بے سہبی تیا پڑدہ شاغنگ کن دا غٹ آن آسان کسر ءِ کہ اونا زموار پین اسٹ اسے گوندنگے۔ ننے سویلین ادارہ غاتا کاریم نا کچ ءِ ودفوئی مریک۔ پاکستان سیم انا ایپار آن دہشت گرد آتا جلہو ءِ توننگ کن کیہی سیکورٹی گام گیج کرینے۔ تحریک طالبان پاکستان (ٹی ٹی پی ) پاکستان نا برخلاف پرتشدد کارروائی تیکن اوغانستان نا کسر ءِ کاریم اٹ اتیک ہراڑاننے گڑتی ءِ۔ نن اوغان عبوری حکومت تون دا باندات ءِ ہرفسا کرینن ۔ تینا گل زمین  و الس نا رکھ اکن ہر گام  ءِ ہرفنہ۔ پاکستان ہروڑنا دہشت گردی نا مذمت ءِ کیک۔