کشت وکشار، کانڑ کنی نا بشخ آتیٹی چین نا آزموندہ غاتیان فائدہ ہرفنہ، چیئرمین سینیٹ محمد صادق سنجرانی

اسلام آباد۔ 26 ستمبر (اے پی پی) چیئرمین سینیٹ محمد صادق سنجرانی پارینے کہ کشت وکشار، کانڑکنی نا بشخ آتیٹی چین نا آزموندہ غاتیان فائدہ ہرفنہ، ’’پاک ۔چین اقتصادی راہداری‘‘ ڈٹ انا سوب آن اسیجائی شونداری و شونہالی نا پوسکن آ دور بناکرینے، پارلیمانی ڈل آتا ہن و براٹی ترندی اتنگ وخت انا اہم ءُ گرج اسے۔ داخیال آتا درشانی ءِ او سے شنبے نادے آ داڑے چین نا سفیر جیانگ زائیڈانگ تون اوڑدہی ٹی کرے۔ اوڑدہی ٹی ہڑتوم آکنڈآتا تعلقداری، اقتصادی کمکاری، رابطہ کاری تون اوار تین پہ تینی است خواہی نا امور آ گپ وتران تون اوار اوار  ہڑتوم آملک آتا نیام اٹ تین پہ تینی فائدہ کن چندی بشخ آتیٹی  ہڑتوم آکنڈآتا کمکاری ءِ پین مون آ دننگ نا عزم انا درشانی ءِ کننگا۔ داوخت آ چیئرمین سینیٹ جیانگ زائیڈانگ ءِ بطور سفیر زمواری سنبھالنگ آ مبارکبادی ترسا پارے کہ اومیت ءِ کہ او تینا پبی لائخی تے کاریم اٹ اتسا پاکستان و چین تعلقداری تے پین سوگو کننگ اٹ تینا کڑد ءِ ادا کیک۔ چیئرمین سینیٹ ڈیہہ اٹی امن نا قیام کن چین نا کوشست آتا ستاءِ کرے۔ اوڑدہی ٹی کثیر الجہتی بشخ آتیٹی کمکاری ءِ ودفنگ نا گرج آ زور شاغنگا۔ اوڑدہی ٹی کشت وکشار، کانڑ کنی نا بشخ آتیٹی ہڑتوم آ کنڈآتا کمکاری ءِ مون آدننگ آ ہم گپ وتران کننگا۔ چیئرمین سینیٹ پارے کہ کشت وکشار ، کانڑ کنی نا بشخ آتیٹی چین نا آزموندہ غاتیان فائدہ ہرفنہ، ’’اسٹریٹجک کمکار شریداری ‘‘ پاک۔ چین تعلقداری تے پین سوگو کیک، ہڑتوم آ ملک آک  ہرحالیت اٹی اسہ ایلو تون سلیسنو، ہرپلیٹ فارم آ چین و پاکستان اسہ ایلو ءِ سپورٹ کرینو۔ اوچین نا این پی سی نا سروک ءِ پاکستان نا دورہ نا سلہ خلسا پارے کہ پارلیمانی ڈل آتا ہن وبراٹی ترندی اتنگ وخت انا اہم ءُ گرج اسے، چین نا سرمایہ مون آ کائے، پاکستان اٹ زرکاری کن چاگڑد سازگار ءِ ، اسیجائی ڈٹ آتیان ہڑتوم آ ملک آتے فائدہ مریک، زرکاری کن پوسکن آ کسر آوار مننگ اٹ کمک رسینگک۔ چین نا پاکستان اٹ زرکاری ورناتیکن روزگار نا پوسکن ءُ وارخواہی فراوان کرینے، پاکستان وچین نا الس نا است اسہ ایلو تون گنڈوک ءُ۔ محمد صادق سنجرانی چین نانجی بشخ انا پاکستان اٹ زرکاری نا ستاءِ کرسا پارے کہ چین نا چندی کمپنی پاکستان نا مر مر انگا علاقہ غاتیٹی کاریم کننگ ءُ، چین نا صدر شی جن پنگ نا قائدانہ لائخی تا مچ آ دنیا معترف ءِ، صدر شی جن پنگ نا کتاب نامطالعہ ءِ کریٹ بھاز زہمی مسٹ، چیئرمین سینیٹ سلاہ تس کہ نا کتاب بایدے اردواٹی ہم مٹ وبدل مرے۔ چینی سفیر پارے کہ پاکستان چین نا خڑکی سنگت ءِ، چین ہڑتوم آ کنڈآتا کمکاری ءِ پین سوگو کننگ نا خواہندار ءِ، چین نا آزموندہ غاک پاکستان نا راجی و زرگزرانی شونہالی ٹی کمکار مریرہ۔ اوپارے کہ پاکستان آ برسا خوشی محسوس مس، سفارتی ، راجی، اقتصادی تعلقداری تے پین مون آ دننگ اٹ کڑد ادا کیوہ۔ جیانگ زائیڈنگ پارےکہ چین زوت آتے اٹ اسہ وائٹ پیپراس شینک کرے ہرانا سرحال ’’بنی نوع انسان نا اسیجاآخبت‘‘ ءِ، وائٹ پیپر نا مسخت دنیا ءِ امن شونداری نا وت کننگ ءِ۔اوڑدہی ٹی چین نا سفیر چیئرمین سینیٹ ءِ چین نا دورہ نا سلہ ہم خلک۔ داوخت آ سیکرٹری سینیٹ محمد قاسم صمدخان و ایڈیشنل سیکرٹری عاصم خان گورایائسک ہم ساڑی ئسر۔