بلوچستان نا شونداری کن معدنی وسیلہ غاتیان پبی فائدہ ہرفنگ ناگرج ءِ، سرفراز احمد بگٹی

اسلام آباد۔ 26 ستمبر (اے پی پی) نگران وزیرداخلہ سرفراز احمد بگٹی پارینے کہ بلوچستان نا شونداری کن معدنی وسیلہ غاتیان پبی فائدہ ہرفنگ نا گرج ءِ ، سیاسی عزم و کاریم نا کچ اٹی ودکی آن حالیت آتیٹی گچینی اتنگ مریک۔ داخیال آتا درشانی ءِ او سے شنبے نادے آ بلوچستان رورل ڈویلپمنٹ اینڈ کمیونٹی ایمپاورمنٹ (ایمبریس) پروگرام نا ایسری دود آن تران کرساکرے۔ اوپارے کہ داپروگرام نا اڈتننگ آ پاکستانی خاص وڑاٹ بلوچستان نا الس نا کنڈآن یورپی یونین و ایلو شریدار آتا منت وار اُن۔ داپروگرام نا کمک اٹ بلوچستان نا مر مر انگا علاقہ غاتیٹی آگاہی ودی کننگ اٹ کمک رسینگانے۔ یورپی یونین  داوڑنا پروگرام نا چرجوئی ءِ پین برجاتخے۔ اوپارے کہ بلوچستان معدنی وسیلہ غاتیان شپ ءِ۔ صوبہ نا الس نا شونداری کن دا وسیلہ غاتیان پبی فائدہ ہرفنگ نا گرج ءِ۔ سیاسی عزم و کاریم نا کچ اٹی ودکی آن حالیت آتیٹی گچینی اتنگ مریک۔ اوپارے کہ غیرمتوازن شونداری غٹ پدتموک ملک آتا ویل ءِ۔ تشدد یا اوڑا سیاست ویل انا ایسر اف۔ اوپارے کہ سجفنگ نا ہیت اسے نن تینا پوسکن آ چین  انا شونداری کن انت ڈٹ بندی کرینن۔ داڑا سیاست  کننگ انگ ءِ و اودے کرپشن نا منبع اس جوڑ کننگانے۔ اوپارے کہ نن کس اسے آ ہورہرفنگ ناجاگہ غا اول تینا احتساب ءِ کین۔ او پارے کہ کنا خلقی علاقہ سے آن تعلق ءِ۔ ریاست موقع تس تو  خواری اٹ داہند آ سرمسونٹ۔ خواری اٹ ہربندغ ءِ وارخواہی و سرسہبی ملک۔ مرمرآن بروک آ زالبول آتے ہم اوفتا خواری اٹ مون آ بننگ نا موقع ملانے۔