نانجنگ۔26 ستمبر (اے پی پی) نگران بنجائی وزیر حوالکاری و شینکاری مرتضیٰ سولنگی دودوربیدہ ئی تعلقداری تے مون آ دننگ کن شنگھائی کمکار تنظیم (ایس سی او) نا باسک ملک آتا میڈیا تنظیم تا نیام اٹ اسیجائی پروڈکشن و دستاویزی فلم آتا تیاری تون اوار چندی بشخ آتیٹی رابطہ غاتے ودفنگ نا گرج آ زور شاغسا پارینے کہ شنگھائی کمکار تنظیم نا باسک انا حیثیت اٹ پاکستان میڈیا کمکاری نا مون آدننگ کن سنبرینگوک ءِ، اسیجائی پروڈکشن باسک ملک آتا دودوربیدہ و سیل و سوات ءِ مون آدننگ اٹ کمکار جوڑ مریک و باسک ملک آک اسہ ایلو نا آزموندہ و پوسکن آٹیکنالوجی آن فائدہ ہرفنگ کیرہ۔ سے شنبے نادے آ شنگھائی کمکار تنظیم نا ٹی وی فیسٹیول نا بشخ ہلوک آتیان تران کرسا نگران بنجائی وزیر حوالکاری پارے کہ پاکستان و چین داسال سی پیک نا دہ می سال دے ءِ اڈتننگ ءُ، ہفت دہائی تیا تالان پاک چین سنگتی نا دا شاندار سفر انفرادی حیثیت تخک۔ اوپارےکہ ہڑتوم آ ملک آک اسہ ایلو کن آہنی ایلم نا درجہ تخرہ، و اوفتا نیام اٹ دودوربیدہ ئی رابطہ پیڑی تیا متکن ءُ۔ اوپارےکہ چین پاکستان اقتصادی راہداری (سی پیک) نا فریم ورک آن دا رابطہ پین سوگو مسنے۔ اوپارے کہ چین و پاکستان 2023ء آ ہڑتوم آ ملک آتا نیام اٹ سیل و سواتی ہن و بر نا سال گوندانے ہرانا مسخت السی کہول آ ڈل آتا ہن و بر ءِ مون آ دننگ تون اوار اوار متحرک سیل و سواتی و دودوربیدہ ئی چاگڑدی نظام اس ٹہیفنگ ءِ۔ مرتضیٰ سولنگی پارےکہ شنگھائی کمکار تنظیم (ایس سی او ) ڈیہہ انا باسک ملک آتیکن راجی، اقتصادی ، مواصلات ، میڈیا و دودوربیدہ ئی بشخ آتیٹی جوان وپائیدار کمکاری نامون آ دننگ کن فائدہ ئی و اومیت افزا پلیٹ فارم اسے، ریڈیو، ٹیلی ویژن و ایلو آڈیو وژیول گڑاتا بشخ آتیٹی شنگھائی کمکار تنظیم نا باسک آتا نیام اٹ کمکاری تنظیم نا سرسہبی نا درشانی ءِ۔ اوپارےکہ شنگھائی کمکار تنظیم نا باسک انا حیثیت اٹ پاکستان میڈیا کمکاری نا مون آ دننگ کن سنبرینگوک ءِ۔ مرکزی میڈیا و سوشل میڈیا ٹی کمکاری السی کہول آ رابطہ غاتا مون آ دننگ کن اہم کڑد ادا کیک۔ نگران بنجائی وزیر حوالکاری شنگھائی کمکار تنظیم نا باسک ملک آتا میڈیا تنظیم تے پاکستان تون اسیجائی پروڈکشن و ایلو ڈٹ آتیٹی شریداری نا سلہ خلسا پارے کہ ایس سی او نا باسک ملک آک اسہ ایلو نا آزموندہ و پوسکن آ ٹیکنالوجی آن فائدہ ہرفنگ کیرہ، اسیجائی پروڈکشن آک ننا ملک آتا دودوربیدہ و سیل و سواتءِ مون آ دننگ اٹ کمکار مریرہ۔
