اسلام آباد۔ 26 ستمبر (اے پی پی) نگران حکومت پیدوار کرینے کہ اسلامی جمہوریہ پاکستان نا آئین و مروجہ گچین کاری کانود نا رداٹ غٹ سیاسی جماعت آتے لس گچین کاری تیٹی بشخ ہلنگ نا بریبر حق دوئی ءِ، نگران وزیراعظم نا ایسوسی ایٹڈ پریس ءِ تروک آ انٹرویو ٹی ریمارکس ءِ غلط رپورٹ کننگا۔ وزارت حوالکاری ایسوسی ایٹڈ پریس ءِ تروک آ انٹرویو نا اصل متن نا حوالہ ءِ تس ہراڑان پاش مریک کہ نگران وزیراعظم پیدوار وڑاٹ سلاہ کریکہ کہ گچین کاری تیٹی بشخ ہلنگ اسہ حق اسے لوے ڈوہ آ سزا کانودی وڑاٹ روا ءِ۔ وزارت حوالکاری داہیت آ است ہسونی نا درشانی ءِ کرےکہ انٹرویو نا اسہ بشخ اسے سٹی دا تاثرتننگا کہ خاص ءُ بندغ اسے لس گچین کاری تیٹی بشخ ہلنگ نا موکل تفننگک۔ وزارت حوالکاری وزیراعظم نا انٹرویو نا متن نا کنڈآچکار کرفے ہراٹی نگران وزیراعظم انوارالحق کاکڑ پارے کہ ‘‘ نن کس اسے آن ذاتی بیر ہلپننگ اُن ولے داہیت ءِ پک کینہ کہ کانود غٹ آن اہم ءِ، چائے عمران خان مرے یا پین سیاست دان اس ، کس اس ہم ملکی کانود ناخلاف ورزی ءِ کیک تو اوڑا کانود لاگو مریک، نن اودے سیاسی پرخ انا مترادف گوندنگ کپنہ۔ اوپارے کہ شفاف گچین کاری عمران خان یا اونا پارٹی نا ہمو باسک آتیان بیدس ہم مننگ کیرہ ہرا زندان تیٹی ءُ انتئے کہ او عمرا ن خان نا مئی ٹی دزگیری آن پد توڑ پھوڑ و جلاؤ گھیراؤ تون اوار ایلو غیرکانودی سرجزآتیٹی اوار ئسر۔ انوارالحق کاکڑ مستی پارے کہ عمران خان نا پارٹی نا ہزار آ مخلوق ہرا غیرکانودی سرجزآتیٹی اوار افس او سیاسی عمل و گچین کاری تیٹی بشخ ہلیرہ۔ ’’ وزارت حوالکاری تینا باضابطہ بیان اٹی داہیت انا درشانی ءِ کرے کہ پی ٹی آئی و اونا راہشون پین جماعت اسے آنبار گچین کاری تیٹی بشخ ہلنگ کن آجو ءُ۔ داپیدوار کننگانے کہ جم وڑاٹ پی ٹی آئی یا پارٹی نا راہشون اسے نا الیکشن ٹی بشخ ہلنگ اٹ ہچ ءُ اڑاند اس اف۔ بیان اٹی مستی پاننگاکہ ہر شاری کانود نا مون آ بریبر ءِ و کانودی دوبہ غاتون مون تروک آ اسہ بندغ اسے نا بابت کانود تینا کسر ءِ اختیار کیک۔ عدلیہ آجو و وتواجہ ءِ، و نگراں حکومت تون نئے تو عدالت آتیا اثرانداز مننگ نا اختیار اسے نئے ارادہ۔ نگران حکومت آجو و انصاف اٹ گچین کاری تا اڈتننگ کن سنبرینگوک ءِ۔ نگراں حکومت گچین کاری تا اڈتننگ کن آئینی وکانودی پنجر نا مخ تفی ءِ کیک و داہیت ءِ پک کیک کہ الیکشن کمیشن آف پاکستان و آجو عدلیہ نا غٹ پرمان و پارت آتیا پورو عمل کننگے۔
