اسلام آباد۔ 26 ستمبر (اے پی پی) اسپیکر قومی اسمبلی راجہ پرویز اشرف نیدر لینڈز انا شار دی ہیگ اٹی قرآن پاک نا بے شرفی نا واقعہ نا مذمت ءِ کرسا پارینے کہ قرآن پاک نا بے شرفی نا شرمناک فعل انا اخس کہ مذمت ءِ کننگے کم ءِ، داگندہ انگا کاریم آن مچ آ دنیا ٹی رہینگوک آ مسلمان تا احساس و جوزہ غاک بھاز بے وڑ مجروح مسنو۔ سے شنبےنادے آ تینا مذمتی بیان اٹی اوپارے کہ آجوئی درشانی سلاہ نا آڑ اٹ اسٹ اسے ہم پین مذہب آن تعلق تخوک آ مقدس مذہبی کتاب آتا بے شرفی ءِ کننگ نا موکل تننگ مفک۔ اوپارے کہ اسام اسہ پرامن ءُ مذہب اسے و غٹ مذہب آتا رغاموک و عقیدہ غاتا شرف نا درس ایتک ، اسلام اٹ بے چیٹی، بدامنی، خارتس کارروائی تا ہچ ءُ گنجائشت اس اف۔ اسپیکر قومی اسمبلی پارے کہ دا وڑنا گندہ انگا واقعہ غاتیان است آتیٹی اسہ ایلو کن خارودی مریک ہرا دنیا نا امن کن خطرہ نا سوب ءِ، جہانی برادری داوڑنا شرمناک کارروائی تا تونگ کن دمدستی گام گیج کے۔
