واشنگٹن۔ 26 ستمبر (اے پی پی) بھارت اٹی اقلیت آتا برخلاف خارتس تقریر وڈوہ و جلہو آتیا نظر تخوک آ امریکی تنظیم ہندوتواواچ انا اسہ رپورٹ اسے ٹی پاننگانے کہ بھارت اٹی 2023 نا اولیکو شش تُو اتی مسلمان تا برخلاف کم وود اسہ دے اٹی اسٹ آن زیات وار خارتس تقریر آتا واقعہ پیش مس وداواقعہ غاک ہموریاست آتیٹی زیات خننگار ہراڑے گچین کاری مننگ والائس۔ برطانوی اخبار نا رداٹ ہندوتوا واچ انا رپورٹ اٹی پاننگانے کہ 2023نا اولیکو ششماہی ٹی چندی مچی تیٹی مسلمان تا برخلاف خارتس تقریر آتا 255 واقعہ رپورٹ مس وخت اس کہ داچرجوئی ٹی تدوک آ سال آتا ہچ ءُ تقابلی ڈیٹااس ساڑی اف ۔ ہندو توا واچ خارتس تقریر آتا بابت اقوام متحدہ نا تعریف ءِ کاریم اٹ ایس، ہراٹی پاننگانے کہ ابلاغ نا اسہ ہم ہندن ءُ دروشم اس ، ہراٹی مذہب، نسل، قومیت ، رنگ ، جنس یا ایلو شناختی عوامل تا بنداو آ بندغ یا گروہ سے کن متعصبانہ یا امتیازی زبان کاریم اٹ اتنگے۔ رپورٹ نا رداٹ کم وود 70 درسد واقعہ ہموریاست آتیٹی مسنے ہراڑے 2023 و2024اٹی گچین کاری تا مننگ والا ءِ۔ رپورٹ اٹ پاننگاکہ بھارتی ریاست مہاراشٹر، کرناٹک ، مدھیہ پردیش، راجستھان و گجرات اٹی خارتس تقریر آتا اجتماع تا غٹ آن زیات کچ مون آ بس و بیرہ مہاراشٹر اٹی داوڑنا 29 واقعہ مس ۔ زیات تر واقعہ غاتیٹی سازشی نظریہ غاتا ذکر ءِ کننگا و مسلمان تا برخلاف تشدد و اوفتا راجی و اقتصادی بائیکاٹ نا خواست ءِ کننگا۔ داواقعہ غاتیان کم و ود 80 درسد وزیراعظم نریندر مودی نا ہندو قوم پرست بھارتیہ جنتا پارٹی (بی جے یو) نا بست وبند اٹی علاقہ غاتیٹی رونما مس، ہرانا 2024اٹی مروک آ لس گچین کاری تیٹی سرسہبی نا گمان ءِ۔ ہندوتواواچ پارے کہ رپورٹ نا چرجوئی ٹی او ہندوقوم پرست گروپ آتا آن لائن سرجزآتا پدرند ءِ خلک، سوشل میڈیا پوسٹ کروک آ خارتس تقریر آتا تصدیق شدہ ویڈیو تے ہرا و میڈیا ٹی رپورٹ کروک آ واقعہ غاتا ڈیٹااس جوڑ کرے۔ ایلو کنڈآ بھارتی وزیراعظم نریندر مودی نا حکومت اقلیت آتون بدسلوکی نا دا رپورٹ آتا انکار کرسا بسنے و واشنگٹن اٹی واقع بھارتی سفار ت خانہ دا باندات آ تران کننگ نا درخواست نا ورندی ءِ تتو۔
