اسلام آباد۔ 25 ستمبر (اے پی پی) نگران وزیرجان جوڑی ڈاکٹر ندیم جان پارینے کہ انجکشن اواسٹین (Avastin)نا بہا کننگ و فراوانی ءِ توننگانے۔ یک شنبے نادے آ بنجائی وزیر داہیت ءِ صوبائی وزیر پرائمری اینڈ سیکنڈری ہیلتھ کیئر پنجاب ڈاکٹر جمال ناصر تون اوڑدہی آن پد پارے۔ اوپارے کہ دمدستی وڑاٹ ایکشن ہلسا منفی ردعمل نا سوب جوڑ مروک آAvastinنا انجکشن ءِ مارکیٹ آن پدی ہلنگ نا فیصلہ کننگانے۔ نگران وزیرپارے کہ زہمی ناجوڑ نا کنڈآن انجکشن آواسٹن نا منفی ردعمل نا بارواٹی معلومداری ملنگ آ او دمدستی وڑاٹ وزیر جان جوڑی پنجاب تون رابطہ کرے۔ اوپارے کہ انجکشن فراوان کروک آ اِرا بندغ آتا برخلاف ایف آئی آر درج کرفنگانے۔ اوپارے کہ سینئر ڈاکٹر و چاہندار آتیاتالان پنچ باسکی کمیٹی اس جوڑ کننگانے ہرا غٹ زاویہ غاتے اٹ باندات نا جاست وپاست ءِ کرسا مسہ دے اٹی رپورٹ پیش کیک۔ ڈاکٹر ندیم جا ن پارے کہ پنجاب حکومت تون پدریسہ رابطہ ٹی اُٹ و نن داہیت ءِ پک کینہ کہ باندات نا پورو چھان بین ءِ کننگے وزموارآتا برخلاف کارروائی کننگے۔ زہمی ناجوڑ آتا جوان خیال ءِ کننگک و اوفتے ریلیف تننگ کن ہرممکن آسراتی فراوان کننگک۔ ڈاکٹر ندیم جان مستی پارے کہ او وزیر جان جوڑی پنجاب آن ڈینگی نا حالیت آتیا ہم گپ وتران کرینے۔ اوپارے کہ پنجاب نا محکمہ جان جوڑی نا کمامدارآک حالیت آتے جوان وڑاٹ سنبھالنگ ءُ۔ اوپارے کہ مچ آپنجاب اٹی داسال داتم اسکان 3500 کیس رپورٹ مسنے وخت اس کہ تدوک آ سال انا ہندا وخت اٹی کیس آتا کچ 10 ہزار ئس۔ اوپارے کہ پنجاب اٹی داتم اسکان ہچ ءُ ہلاکت اس متنے انتئے کہ 15 اکتوبر آن پد ڈینگی نا کیس آتیٹی کمتی نا رجحان ءِ، ’’ننے ناجوڑی نا مون ءِ توننگ کن گام گیج آتے ہندا جوش و چکار اتون پین مسٹ آن چار ہفتہ اسکان برقرارتخنگ نا گرج ءِ‘‘۔ اوپارے کہ داوخت آ صوبہ ٹی المی دوائی تا ہچ ءُ کاختی اس اف و بھلو کچ اسے ٹی سٹاک ساڑی ءِ۔ نگران بنجائی وزیر پارے کہ نن جان جوڑی نا بشخ اٹی پیدوار گچینی اس اتنگ کن سنبرینگوک اُن۔
