اسلام آباد۔ 25 ستمبر (اے پی پی) اینٹی نارکوٹکس فورس (اے این ایف) منشیات اسمگلنگ نا برخلاف کریک ڈاؤن اٹی 6کارروائی تیٹی 115 کلوگرام آن زیات منشیات دوئی کرسا 7 دوبہ دارءِ دزگیرکرے۔ اے این ایف ترجمان نا رداٹ موٹروے ٹول پلازہ اسلام آباد نا خڑک اے این ایف اِرا کارروائی کرے۔ داکارروائی تیٹی 2 گاڈی آن جم وڑاٹ 64 کلو 800 گرام چرس دوئی کننگا۔ دوئی منشیات آتے گاڈی تا اودیم خانہ غاتیٹی اودیم کننگاسس۔ کارروائی ٹی پشاور و خیبرنا ہنکینی 4 دوبہ دار ءِ دزگیرکننگا۔ موٹروے ٹول پلازہ شیخوپورہ نا خڑک گاڈی اسے آن 20 کلو 400 گرام ہفیم، 14 کلو 400 گرام چرس و 1 کلواس ہیر دوئی کننگا۔ منشیات آتے پک اپ گاڈی اسے نا کیرغ آن تفسا اسمگل کننگاکہ۔ کارروائی ٹی نوشہرہ نا ہنکینی 2 دوبہ دار آتے موقع غا دزگیرکرے۔ باچاخان انٹرنیشنل بالی پٹ آ مسافر اسے نا پڈ آن 107 ہیرون آن پُر کیپسول دوئی کننگا۔ خیبرنا ہنکینی دوبہ دار جہاز نمبر GF-787 نا کمک اٹ دبئی کن روانہ مسکہ۔ خیبر نا علاقہ زخہ خیل اٹی اِرا کارروائی تیٹی اودیم کروک آ 15 کلوگرام چرس دوئی کننگا۔ ترجمان پارے کہ دزگیر دوبہ دار نا برخلاف منشیات ایکٹ نا رداٹ مقدمہ درج کرسا مستی جاست وپاست نا بناءِ کننگانے۔
