اسلام آباد۔ 25 ستمبر (اے پی پی) وزارت حوالکاری و شینکاری پاکستان چائنہ انسٹیٹیوٹ (پی سی آئی ) نا شریداری اٹ مچ آملک فوٹوگرافی مقابلہ نا بناءِ کرینے ہراٹی چین نا بیلٹ اینڈ روڈ انیشی ایٹیو(بی آر آئی) نا رداٹ چین پاکستان اقتصادی راہداری(سی پیک) ڈٹ آتیا مروک آ پیش رفت ءِ تالان کننگک۔ دارداٹ بنجائی سیکرٹری حوالکاری وشینکاری ظہور احمد نا کماشی ٹی دوشنبے نادے آ اسہ دیوان اس اڈ ہلک ہراٹی ’’ملک گیر بیلٹ اینڈ روڈ انیشی ایٹیو پروجیکٹ فوٹو گرافی مقابلہ‘‘ نابست وبند آتاجاچ ءِ ہلنگا۔ دیوان اٹی پاکستان چائنا انسٹیٹیوٹ نا سروک مصطفی ٰ سید آن بیدس ایگزیکٹیو ڈائریکٹر جنرل /پرنسپل انفارمیشن آفیسر (پی آئی او) محمد عاصم کچھی، ڈائریکٹر جنرل ایکسٹرنل پبلسٹی ونگ گودی عنبرین جان، ڈپٹی ڈائریکٹر جنرل پی آئی ڈی رئیسہ عادل و وزارت حوالکاری و اوڑتون ملحقہ محکمہ غاتا سینئر آفسیر آک بشخ ہلکر۔ سیکرٹری حوالکاری و شینکاری ظہور احمد فوٹو گرافی مقابلہ نا بناءِ کننگ و سلاہ کننگ آ پاکستان چائنا انسٹیٹیوٹ نا کوشست آتا ستاءِ کرسا پارے کہ سی پیک و بی آر آئی ڈٹ آتے تالان کننگ آن بیدس دا مقابلہ پاکستان و چین نا نیام اٹ خڑکی و تعلقداری تے پین سوگو کننگ اٹ ہم کمکار مریک۔ اوپارے کہ پاکستان سی پیک و بامسخت چین پاکستان شریداری نا قدر ءِ کیک ہرانا رداٹ سڑک آتا بنداوی پنجر، ریلوائی و توانائی تون اوار چندی اہم ڈٹ تین پہ تینی فائدہ کن پورو کننگا۔ سیکرٹری حوالکاری پاکستان چائنا انسٹیٹیوٹ ءِ ہرممکن کمکاری نا باوری کرفے و وزارت نا تعلقدار محکمہ بشمول پی ٹی وی ریڈیو پاکستان ، اے پی پی، پی آئی ڈی ، ای پی ونگ ، آئی پی ونگ، ڈائریکٹوریٹ آف الیکٹرانک میڈیا پبلی کیشنز و ایلوفتے پارت کرینے کہ او تینا ملٹی میڈیا پلیٹ فارم آتیا دا عکسی مقابلہ ءِ سرسہب کننگ کن ہرممکن کمک کیر۔ پاکستان چائنہ انسٹیٹیوٹ نا سروک مصطفیٰ سید دیوان ءِ ملک گیر عکسی مقابلہ نا گرج و مسخت ، وڑوڈول و ٹائم لائن آن معلومدار کرے۔ ٹائم لائن نا رداٹ ’’انفراسٹرکچر اینڈ ڈویلپمنٹ ، پیپلز اینڈ سٹوریز و انوائرمنٹل امپیکٹ‘‘ نا کیٹیگری تیٹی پاکستان اٹ سی پیک و بی آر آئی ڈٹ آتا بابت عکس 7 اکتوبر اسکان جمع کرفنگ مریک وخت اس کہ 8 اکتوبر آن 9 اکتوبر اسکان پنی آ فوٹو گرافر، فنکار و رتعلقدار سرکاری ادارہ غاتیا تالان پینل نا کنڈآن گڈیکو فیصلہ غان پد مقابلہ نا سرسہب مروک آتا پڑو ءِ 10 اکتوبرآکننگک۔ وزارت حوالکاری و شینکاری و پاکستان چائنا انسٹیٹیوٹ نا شریداری اٹ انعام بشخنگ نا دود و نمائش 12 اکتوبر 2023ء آ اڈ ہلیک ہراٹی ممتاز شخصیت، کمامدار و میڈیا آن تعلق تخوک آ بند غ آک بشخ ہلیرہ۔ دیوان ءِ پاننگاکہ پاکستان چائنا انسٹی ٹیوٹ اسہ غیرسرکاری ، غیر جانبدار و غیر سیاسی تھنک ٹینک ءِ ہراپاکستان و چین نا الس نا نیام اٹ تعلقداری تے مون آ دننگ کن کوشست کننگ ءِ۔ پاکستان چائنا انسٹیٹیوٹ ایوارڈ کٹوک آتیکن چین نا دورہ نا ہم بست وبند ءِ کیک۔
