کوئٹہ۔ 25 ستمبر (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ مستین نا مقابلہ ٹی چین نا تاریخی شارکاشغر نا اہمیت دوچند مسنے متکن آ سلک روٹ اتون وابستگی کاشغر ءِ مدام اہم جوڑ کرے کاشغر نا جغرافیائی سیم تا اہمیت آن نہ من مننگ مفک پاکستان و نیامی ایشیائی ملک آتون دودوربیدہ ئی وڑاٹ منسلک کاشغر سی پیک ڈٹ آتا سوب آن جہانی اہمیت اختیار کرینے سنکیانگ صوبہ نا بے کچ اہم واپاری و دودوربیدگی شار کاشغر ءِ زرگزرانی حب انا حیثیت دوئی مسنے۔ داڑے جاری مروک اسہ بیان اسے ٹی سینیٹر عبدالقادر پارے کہ سی پیک نا رداٹ پاکستان و چین شریداری ءِ دہ سال پورو مسنے داسہ وخت بسنے کہ پاکستان دا عظیم الشان ڈٹ آن فائدہ ہرفسا تینا اقتصادی ویل آتے سنجیدگی اٹ ایسر کننگ نا کنڈآ چکارکے سی پیک ڈٹ انا رفتار نا جاچ ءِ ہلسا ایلو ملک آک ہم پاکستان ات زرکاری کننگ آ آمادہ مریرہ پاکستان کن بروک آ اسہ سال بے کچ اہمیت تخرہ اگرچہ سعودی عرب و متحد ہ عرب امارات پاکستان اٹ بھلو زرکاری اسے نا عندیہ تسنے ولے داوخت آ اوتیل ءِ ہبو تیل انا دھار ءِ ہبو نا مصدق حالیت آتا جاچ ءِ ہلنگ ءِ۔ اوپارے کہ پاکستان ءِ اقتصادی ویل آتون مون تننگ کن سنجیدگی نا تاثرتروئی مریک سعودی عرب و متحدہ عرب امارات نا کنڈآن زرکاری نا پڑو ءِ کننگ آن پد ہم سعودی عرب نا شہزادہ محمد بن سلمان نا بھارت آن پد پاکستان نا دورہ غان پاناد کننگ پاکستان کن ستاکڑزوک اف پاکستان ءِسیاسی وڑاٹ اجتماعی سنجیدگی و کمٹمنٹ نا درشانی ءِ کروئی مریک نن دا تکنہ کہ دنیا ننے خنپننگ ءِ ننا دا خام خیالی ءِ دنیا نا ننے آ بھلو نظر اسے ننے نیزگار الس ءِ لتاڑسا تخنگ نا پالیسی ءِ ہلسا اوفتے ریلیف تننگ نا پالیسی آ عمل کروئی مریک۔ چیئرمین اسٹینڈنگ کمیٹی پارے کہ پاکستانی حکمران تے دمدستی وڑاٹ الس ءِ ریلیف فراوان کروئی مریک اسُل ہندن ہراوڑ چین نا سرکڑدہ غاک تینا الس ءِ ریلیف ترسا تینا نت تیا سلفنگ نا قابل کرینو چین نا صوبہ سنکیانگ اٹ ہراڑے اِرا دہائی مست نیزگاری، بے روزگاری ودہشت گردی ئس چین نا حکومت آک دا ویل آتے سنجیدگی اٹ ایسر کننگ کن عمل نا قابل پبی گام گیج کریر و داسہ سنکیانگ نا صوبہ بھاز ترندی اٹ شونداری نا مزل آتے طے کننگ اٹی ءِ حکمران الس نا ویل آتے ایسر کیر ملک اناویل آک تینٹ ایسر مریرہ ننے کاشغرنا شونداری آن سبخ اس ہیل کروئی مریک گوادر ءِ ترندی اٹ شون ترسا زرگزرانی حب اس جوڑ کروئی مریک۔
