کوئٹہ۔ 25 ستمبر (اے پی پی) نیشنل بُک فاؤنڈیشن و شہید بازمحمد خان فاؤنڈیشن نا کنڈآن پشتون کلچر ڈے انا رداٹ شہید باز محمد خان ڈیجیٹل لائبریری جناح ٹاؤن اٹی مسہ دے ئی کتاب میلہ نا بناءِ کننگا۔ میلہ نا بناءِ مصنف و سینئر ممبر بورڈ آف ریونیو عبدالصبور کاکڑ ربن ءِ کاٹ کرسا کرے۔ دود آن تران کرسا عبدالصبور کاکڑ پارے کہ دودوربیدہ وکتاب اسہ ایلو تون زیل و سُوآنبار ءُ۔ کتاب قوم تا درستی راستی ٹی اہم کڑد ادا کیک و قومک تینا باوہ پیرہ نا بارواٹی کتاب تیان راہشونی ہلیرہ۔ داکتاب آک ءُ ہرا قوم تا تاریخ ، شاعری، علم وادب ، زبان و غٹ ریکارڈ آتے رکھ کرسا اسہ نسل آن ایلو نسل اٹ منتقل کیک۔ مہمان خاص دا کلچر ڈے اٹ کتاب میلہ ءِ اسہ جوان ءُ بنااس گوندا و مخلوق نا کتاب آتیٹی است خواہی نا بے کچ ستا ءِ کرے و اونیشنل بک فاؤنڈیشن نا کنڈآن دا کتاب میلہ ءِ ستاکڑزوک گوندا۔ سینئر ممبر بورڈ آف ریونیو بلوچستان عبدالصبور کاکڑ شہید باز محمد کاکڑ فاؤنڈیشن نا سلوگن نا رداٹ ’’لائبریری جوڑ کبو‘‘ و ’’کتاب بینی مشن‘‘ نا ستاءِ کرسا پارے کہ 21 می صدی ٹی تعلیم و کسب نا گرج بھاز ودانے، مہذب راج انا پہچان اونا تعلیم، شعور، سرسہب تر زند اس تیر کننگ آن معلوم مریک۔ ننے ورناچین ءِ کتاب دینی نا کنڈآ اتوئی مریک، پوسکن ورناتے کتاب بینی، نوشت، علم و پٹ وپول نا کنڈآ اتوئی مریک۔
