نیویارک۔ 22 ستمبر (اے پی پی)نگراں وزیراعظم انوارالحق کاکڑ داپت انا درشانی ءِ کرینے کہ پاکستانی نژاد امریکی پردیسیک تینا زرراہی تس، زرکاری و آسودہی کاریم تا کمک اٹ پاکستان نا راجی و اقتصادی شونداری ٹی تینا کڑد ءِ ادا کرسا کیرہ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم داخیال آتا درشانی ءِ قطبی امریکہ ٹی رہینگوک آ پاکستانی نژاد ڈاکٹر آتا تنظیم (اے پی پی این اے) نا اسہ ڈل اسے تون گپ وتران کرسا کرے ہراایسوسی ایشن نا صدر ڈاکٹر ارشد ریحان نا کماشی ٹی اقوام متحدہ نا جنرل اسمبلی نا دیوان نا وخت آ اوڑتون نیویارک اٹی اوڑدہی کرے۔ نگراں وزیراعظم پاکستان اٹی ایپنا نا راجی آسودہی، تعلیمی و طبی کمکی مشن و پروگرام تتون اوار ڈاکٹر ارشد ریحان نا پاکستانی نژاد امریکی کمیونٹی نا نیام اٹ سیوت و یکجہتی نا کلہو ءِ مون آ دننگ اٹ مثبت کڑد انا ستاءِ کرے۔ اواے پی پی این اے ءِ پاکستان اٹ ہیلتھ ٹورازم، میڈیکل و پیرامیڈیکل ایجوکیشن ، ٹریننگ و سکل ڈویلپمنٹ نا بشخ آتیٹی زرکاری کننگ نا سلہ خلک۔ نگراں وزیراعظم انوارالحق کاکڑ پارے کہ 10 لکھ آن زیات پاکستانی نژاد امریکی پاکستان نا میرات ءُ و ملک انا قومی شونداری ٹی اوفتا کڑد ءِ پورو وڑاٹ امنا کننگک۔ نگراں وزیراعظم پارے کہ پردیسیک امریکہ ٹی پاکستان نا اصل دروشم و پاک امریکہ تعلقداری تے پین سوگو کننگ کن اسہ نہادی ءُ پل اسے ءُ۔ اوڈل ءِ مچ آ دنیا ٹی رہینگوک پاکستانی تے آسودہی فراوان کننگ کن حکومت نا پکا عزم انا باوری کرفے۔ اے پی پی این اے نا صدر ڈاکٹر ارشد ریحان ممبرآتا کنڈآن وزیراعظم تون اوڑدہی ٹی منت واری ءِ ہرفے و وزیراعظم ءِ پاکستان اٹ راجی آسودہی، تعلیمی و طبی بشخ آتیٹی برجااے پی پی این اے نا کاریم نا بارواٹی حوال تس۔
