نیویارک ۔ 22 ستمبر (اے پی پی) نگران وزیراعظم انوارالحق کاکڑ پارینے کہ پیشن نا زرکارآتے پاکستان اٹ زرکاری کن اتنگ اولیت ءِ، حکومت نا غٹ چکار کاروبار دوست چاگڑد ودی کننگ آٹے، حکومت امریکہ پاکستان بزنس کونسل نا سلاہ تے بخیر اٹ پاہک، پاکستان اٹ درملکی زرکاری نا نظام آ یخین تخک۔ داڑے ملوک آ پریس ریلیز نا رداٹ نگران وزیراعظم اقوام متحدہ نا جنرل اسمبلی نا 78 می دیوان نا وخت آ یوعایس پاکستان بزنس کونسل نا ڈل اتون اوڑدہی کرے۔ داوخت آ وزیراعظم گپ وتران کرسا پارے کہ امریکہ نا کارپوریٹ سیکٹر ءِ پاکستان تون تینا متکن و بھرمی تعلقداری تے پین ودفنگ کن وڑوڈول و ذریعہ غاتیا بایدے سجفے۔ وزیراعظم پارے کہ پاکستان نا زرگزران نا غٹ بشخ آتیٹی پیشن نا زرکاری ءِ اتنگ حکومت نا اولیت ءِ۔ حکومت نا چکار کاروبار دوست چاگڑد ودی کننگ آٹے۔ دا چرجوئی ٹی غٹ سلاہ تا خیرمقدم ءِ کننگک۔ وزیراعظم داہیت آ زور شاغا کہ حکومت درملکی زرکاری نا نظام آ یخین تخک و داٹی درملکی زرکارآتے آسراتی فراوان کننگ، اوفتا پت ءِ ودفنگ، کشت وکشار، آئی ٹی، معدنیات ، کانڑ کنی و توانائی نا اولیتی بشخ آتیٹی ڈٹ آتیا عملدرآمد ءِ ترند کننگ کن خصوصی زرکاری کونسل اس جوڑ کرینے۔ نگران وزیراعظم زرکاری کن خاص وڑاٹ کشت وکشار ، فارماسیوٹیکل، جان جوڑی تون اوار چندی بشخ و ڈیجیٹل بینکنگ نا پیدواری ءِ کرے ہراڑے امریکی کمپنی پاکستان اٹ تینا زرکاری ءِ ودفنگ کیرہ۔ کونسل نا صدر ایسپیرانزہ جیلالیان نگران وزیراعظم ءِ عہدہ سنبھالنگ آ مبارکبادی ترسا اودے باوری کرفے کہ امریکہ پاکستان بزنس کونسل حکومت پاکستان تون کمکاری ءِ ودفنگ و زرکاری کن وارخواہی نا پٹنگ کن رابطہ غاتے برجاتخک۔ داوخت آ ڈل انا باسک آک نگران وزیراعظم ءِ پاکستان اٹ تینا کاروبار و پاکستانی مارکیٹ اٹی تینا زرکاری ءِ ودفنگ نا ڈٹ آتابارواٹی معلومدار کریر۔
