نیویارک۔ 22 ستمبر (اے پی پی) نگران وزیراعظم انوارالحق کاکڑ پارینے کہ کشمیر نا جھیڑہ نا ایسری کن اقوام متحدہ نا سلامتی کونسل نا قراردادآتیا عملدرآمد کرفنگے۔ وزیراعظم آفس نا میڈیا ونگ آن جاری بیان نا رداٹ نگران وزیراعظم انوار الحق کاکڑ نیویارک اٹی اقوام متحدہ نا جنرل اسمبلی نا 78 می دیوان نا وخت آ اقوام متحدہ نا سیکرٹری جنرل انتونیوگوتریس تون اوڑدہی کرے۔ وزیراعظم تدوک آ سال پاکستان اٹ نوکاپ اٹی اونابدل مفروک مخ تفی و بحالی و پوسکن تفنگ نا فریم ورک (4 آرایف) آ جنیوا کانفرنس نا اسیجائی مہمانداری آ سیکرٹری جنرل نا منت واری ءِ ہرفے۔ وزیراعظم موسمیاتی بدلی نا بھلا خطرہ غاتا رداٹ شون ہلوک ملک آتا کنڈآن موسمیاتی مالیاتی قول آتا پوروی نا اہمیت آ زور شاغا۔ وزیراعظم اقوام متحدہ نا سیکرٹری جنرل ءِ پاکستان اٹ خصوصی زرکاری آسراتی کونسل نا پیش رفت آن معلومدار کرے ہرانا مسخت ملک انا سوگو اقتصادی بحالی کن زرکاری ءِ مون آ دننگ ءِ۔ وزیراعظم پائیدار شونداری نا ہدف آتے سوگوی تننگ و ایس ڈی جیز ایجنڈا ءِ مون آ دننگ کن سلاہ کروک گام گیج آتیکن اقوام متحدہ نا سیکرٹری جنرل نا جہانی مالیاتی بدلی نا خواست انا ستاءِ کرے۔ وزیراعظم 5 اگست 2019 آ بھارت نا غیرکانودی کوزہ ٹی جموں وکشمیراٹی غیرکانودی و اسہ کنڈی گام گیج انا ذکر ءِ کرسا سیکرٹری جنرل ءِ بھارت نا کنڈآن برجاانسانی حق انا بھلا خلاف ورزی تیان معلومدار کرے۔ اوجموں وکشمیر نا جھیڑہ نا ایسری کن اقوام متحدہ نا سلامتی کونسل نا قرارداد آتیا عملدرآمد کرفنگ آ زور شاغا۔
