نیویارک ۔ 21 ستمبر (اے پی پی) نگران وزیراعظم انوارالحق کاکڑ پارینے کہ پاکستان وامریکہ نا نیام اٹ واپار وزرکاری تون اوار ایلو بشخ آتیٹی کمکاری ءِ مون آ دننگ کن سنبرینگوک اُن، پیشن نا زرکاری کن خصوصی زرکاری سہولت کونسل ءِ جوڑ کننگانے، امریکی زرکارآک داڑان بایدے فائدہ ہرفر، پاکستان ڈیہہ انا غٹ ملک آتون گچین رابطہ غاتا خواہندار ءِ، مقبوضہ کشمیر اٹی 2019ء ٹی بھارتی اسہ کنڈی گام گیج آن ڈیہہ ءِ غیر یقینی حالیت آتا مون تروک ءِ، الیکشن کمیشن نا رداٹ بروک آ لس گچین کاریک جنوری ٹی مریرہ۔ داخیال آتا درشانی ءِ او پنچ شنبے نادے آ امریکہ نا پنی آ تھنک ٹینک کونسل آف فارن ریلیشنز آن تران و گپ وتران کرسا کرے۔ وزیراعظم پارے کہ پاکستان تاریخی وخت آتیان گدرینگ انگ ءِ، بروک آ تُو تیٹی پاکستانی الس پوسکن ءُ حکومت اس گچین کیک، نگران حکومت نا کاریم آجو، انصاف اٹ و شفاف گچین کاری تا اڈتننگ کن کمک فراوان کننگ ءِ، نن جمہوری اصول آتا پابند اُن ہرانا آئین پاکستان اٹ تعین ءِ کننگانے، نگران حکومت نا کوشست ءِ کہ پاکستان نا الس ءِ تینا نمائندہ غاتے گچین کننگ نا پبی موقع تننگے، سوگو و جمہوری پاکستان آن امریکہ کون آملک آتون ننا تعلقداری پین مون آ کاہک۔ اوپارے کہ اسیجائی جمہوری قدر، انسانی حق و کانود نا حکمرانی پاک۔ امریکہ متکن آ تعلقداری تا بنداو ءِ، ہڑتوم آملک آتا کیہی علاقائی و جہانی امور آ اسیجانقطہ نظر ءِ، پاک۔ امریکہ تعلقداری تے پین ملک اسے تون تعلقداری تا رداٹ ہُرپنہ، اوپارے کہ ننا اسیجائی ایجنڈا سیکورٹی کمکاری، زرکاری، آئی ٹی ، توانائی، موسمیاتی بدلی، کشت وکشار، رابطہ، الس نا کہول آتعلقداری و دودوربیدگی ڈل آتا ہن و بر آتالان ءِ۔
