نیویارک ۔ 21 ستمبر (اے پی پی) پاکستان و چین سی پیک ڈٹ آتیا پدریسہ پیش رفت آ است جمی نا درشانی ءِ کرسا پاکستان نا راجی و اقتصادی شونداری کن سی پیک نا مرکزیت آ امنا کرینو و دانا اسیجائی مسخت آتا دوءی کننگ کن اواری اٹ کاریم ءِ برجاتخنگ نا پکا عزم انا درشانی ءِ کرینو۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ و السی جمہوریہ چین نا نائب صدر ہان ژینگ اقوام متحدہ نا جنرل اسمبلی نا دیوان نا وخت آ اوڑدہی کرے۔ اوڑدہی ٹی گپ وتران روایتی گرم جوشی و ہم آہنگی اٹ پبی ئسک ہرا پاکستان چین سدا بہار اسٹریٹجک شریداری نا درستی راستی مسنے۔ اوڑدہی ٹی ہڑتوم آ راہشونک سی پیک تون اوار ہڑتوم آ کنڈآتا تعلقداری تا غٹ پلو و ہڑتوم آ کنڈآتا اقتصادی و مالیاتی کمکاری آ گپ وتران کریر۔ بنداوی ویل آتای چین نا مخ تفی نا درشانی ءِ کرسا وزیراعظم پاکستان نا علاقائی سالمیت، وتواجہی و راجی واقتصادی شونداری کن چین نا بدل مفروک مخ تفی نا ستاءِ کرے۔ اوپارے کہ جموں وکشمیر نا جھیڑہ ئی آ علاقہ ٹی جی 20 نا ہردیوان نا اڈتننگ نا چین نا سخت مخالفت جہانی کانود و اقوام متحدہ نا قرارداد آتا پاسداری کن چین نا اصولی موقف نا ڈیک ءِ ایتک۔ چینی نائب صدر ہان ژینگ پارے کہ پاک چین سنگتی یکتا ءِ و ہڑتوم آ ملک آتا الس نا نیام اٹ برادرانہ تعلقداری نا سوب آن وقتا فوقتا بروک آ بدلی تا مقابلہ ءِ کرینو۔ اومستی پارے کہ اسہ خڑکی ہمسایہ و آہنی ایلم اسے نا حیثیت اٹ پاکستان چین نا ہمسایہ سفارت کاری ٹی اسہ خاص ءُ ہند اس تخک و چین پاکستان نا بنداوی فائدہ غاتا رکھ و پاکستانی الس نا زرگزرانی شونداری و شونہالی کن تینا کوشست آتے برجاتخک۔ ہڑتوم آ راہشونک سی پیک نا 10 می سال دے انا وخت آ ہڑتوم آملک آتیٹی اڈ ہلوک آ دودآتیا ہم است جمی نا درشانی ءِ کریر۔ او کثیر الجہتی فورم تیا تینا کمکاری ءِ پین کڑمب کننگ آ ہم امنا کریر۔ وزیراعظم انوارالحق کاکڑ و چینی نائب صدر ہان پاکستان و چین نانیام اٹ بڑزکوکہول انا ہن و برنارفتار ءِ برجاتخنگ آ امنا کریر۔ وزیراعظم چینی نائب صدر ءِ زوت آن زوت پاکستان نا دورہ ءِ کننگ نا سلہ خلک ہرادے او قبول کرے۔
