پاکستان و ایتھوپیا نا نیام اٹ جہاز آتا بحالی ستاکڑزک، ہڑتوم آ ملک آتا نیام اٹ واپاری و اقتصادی رابطہ غاتے  مون آ دننگ نا گرج ءِ، چیئرمین سینیٹ

اسلام آباد۔ 22 ستمبر (اے پی پی) چیئرمین سینیٹ محمد صادق سنجرانی پارینے کہ پاکستان و ایتھوپیا نا تعلقداری اسیجائی تاریخ، فائدہ و جہانی فورم تیا تین پہ تینی مخ تفی آ تالان ءِ، ایتھوپیا تون واپاری و اقتصادی رابطہ غاتے مون آ دننگ نا گرج ءِ۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او پاکستان اٹ ایتھوپیا نا سفیر جمال بکر عبداللہ تون گپ وتران کرسا کرے ہراجمعہ نادے آ پارلیمنٹ ہاؤس اٹی اوڑتون اوڑدہی کرے۔ اوڑدہی ٹی تین پہ تینی است خواہی نا امور تون اوار واپاری، پارلیمانی رابطہ غاتے پین مون آ دننگ آ زور شاغنگا۔ داوخت آچیئرمین سینیٹ پارے کہ پاکستان و ایتھوپیا نا تعلقداری اسیجائی تاریخ، فائدہ و جہانی فورم تیا تین پہ تینی مخ تفی آ تالان ءِ۔ ایتھوپیا تون واپاری و اقتصادی رابطہ ءِ مون آ دننگ نا گرج ءِ ۔ پاکستان و ایتھوپیا نا کاروباری بندغ آتا نیام اٹ رابطہ غاتے آسان و گچین کننگے۔ اوڑدہی ٹی ہڑتوم آ کنڈآتا واپاری کچ ءِ ودفنگ آ ہم زور شاغنگا۔ محمد صادق سنجرانی پارے کہ پاکستان و ایتھوپیا نا نیام اٹ جہاز آتا اول سر آن بحالی ستاکڑزک۔ کراچی آن ایتھوپین ایئرلائن نا جہاز آتا بناءِ کننگ ستاکڑزوک ءُ گام اسے۔ چیئرمین سینیٹ ایتھوپیا نا حکومت نا داگام آ منت واری ءِ ہرفے۔ اوپارے کہ دا فضائی سروس آن مچ آ افریقہ تون رابطہ کاری ٹی کمک رسینگک۔ ہڑتوم آ ملک آتا نیام اٹ جہاز آتا بحالی آن واپار وسیل و سوات ءِ مون آ دننگ دوئی مریک۔ اوڑدہی ٹی چیئرمین سینیٹ ایتھوپیا تون تعلیم نا بشخ اٹی کمکاری و السی رابطہ ءِ ودفنگ آ ہم زور شاغا وپارےکہ دنیا ٹی اسلاموفوبیا نا توننگ، بین المذاہب ہم آہنگی و تین پہ تینی شرف ءِ مون آدننگے۔ ایتھوپیا ، پاکستان نا اینگیج افریقہ پالیسی نا رداٹ بے کچ اہمیت تخک۔ سفیر اوڑدہی ٹی چیئرمین سینیٹ ءِ ایتھوپیا نا پارلیمنٹ نا سرکڑدہ غاتا کنڈآن ایتھوپیا نا دورہ ءِ کننگ نا ہم سلہ خلک۔ چیئرمین سینیٹ ایتھوپیا نا پارلیمانی سرکڑدہ، حکومت و سفیر نا خصوصی منت واری ءِ ہرفے و پارے کہ پارلیمانی ڈل انا  ہن و برتیان تعلقداری تے پین مون آ دننگک۔ ایتھوپین سفیر پارے کہ افریقی ملک آتا گیٹ وے مننگ نا سوب آن پاکستانی زرکارآک فائدہ ہرفنگ کیرہ۔ جمال بکر عبداللہ پاکستان تون واپاری رابطہ غاتے سوگو کننگ و ہڑتوم آ کنڈآتا تعلقداری تے مون آ دننگ نا بابت تیناعزم انا درشانی ءِ کرے۔