کراچی۔ 22 ستمبر (اے پی پی) نگران بنجائی وزیر حوالکاری و شینکاری مرتضیٰ سولنگی پارینےکہ ساف ، شفاف گچین کاری تا اڈتننگ ننا اسیجائی زمواری ءِ، نگران حکومت گچین کاری تیکن چاگڑد ءِ سازگار کیک، میڈیا گچین کاری تیٹی الیکشن نا چندی ریسہ غاتا بشخ مریک۔ گچین کاری تیٹی الس اسکان سہی معلومداری نا رسینگ ءِ پک کننگ کن مستند رپورٹنگ غٹ آن اہم ءِ۔ داخیال آتا درشانی ءِ او جمعہ نادے آ داڑے نگران وزیراعلیٰ سندھ جسٹس (ر) مقبول باقر تون اوڑدہی ٹی گپ وتران کرسا کرے۔ اوڑدہی ٹی آجو، انصاف اٹ و شفاف گچین کاری کرفنگ، گچین کاری عمل اٹی میڈیا ءِ آسراتی تا فراوانی تون اوار اہم امور آ گپ وتران مس۔ نگران بنجائی وزیر حوالکاری داوخت آ گپ وتران کرسا پارے کہ آئین نا رداٹ تینا زمواری تے سراتینہ، کس اسے تون امتیازی سلوک کننگپک، غٹ سیاسی جماعت آتون گچین تعلقداری خوانہ، اوپارے کہ گچین کاری تیٹی مسند رپورٹ غٹ آن اہم ءِ تانکہ الس اسکان سہی معلومداری نا رسینگ ءِ پک کننگ مرے۔ ہڑتوم آ راہشونک گچین کاری تا شفاف اڈتننگ اٹ پبی کمکاری نا عزم انا درشانی ءِ کریر۔
