مسلم لیگ (ن) بلوچستان نا کارندہ غاک لس گچین کاری تا پبی تیاری تا بناءِ کیر، پاکستان مسلم لیگ (ن) نا مرکزی سینئر راہشون چوہدری نعیم کریم

کوئٹہ۔ 22 ستمبر (اے پی پی) پاکستان مسلم لیگ (ن) نا مرکزی سینئر راہشون چوہدری نعیم کریم پارینے کہ الیکشن کمیشن آف پاکستان لس گچین کاری تے کرفنگ نا پڑو کرینے مسلم لیگ (ن) بلوچستان نا کارندہ غاک لس گچین کاری تا پبی تیاری تا بناءِ کیر، بروک آ وخت مسلم لیگ (ن) نا ءِ، پارٹی قائد میاں محمد نواز شریف نا برخلاف اگہ سازش کننگتوکہ تو پاکستان اینو ایشیانا ٹائیگر مسکہ۔ داہیت ءِ او جمعہ نادے آ مسلم لیگ (ن) بلوچستان نا رابطہ آفس اٹی اوڑدہی کروک آ طارق بٹ، میر ظفر قمبرانی، اشرف جاوید کرد، شبیر غوری، شفیق اعوان، لیاقت راجپوت ، سرفراز بلوچ ، چوہدری محمود نظیر و یاسین گجرتون گپ وتران کرسا پارے۔ اوڑدہی ٹی کوئٹہ ٹی مروک آ بلدیاتی گچین کاری وبروک آ لس گچین کاری تیٹی بشخ ہلنگ نا بارواٹی سرجمی اٹ سجفنگا۔ چوہدری نعیم کریم پارے کہ پاکستان نا شونداری و شونہالی کن میاں محمد نواز شریف ءِ پدی پاکستان آاتوئی مریک۔ اوپارے کہ پارٹی قائد و مسکوہی وزیراعظم میاں محمد نواز شریف نا بننگ نا بابت پارٹی کارندہ غاتیٹی جوش و جوزہ ءِ، کارندہ غاک تینا قائد نا بننگ نا انتظار ءِ کننگ اٹی ءُ انشاء اللہ قائد (ن) لیگ 21 اکتوبر آ پدی وطن آ بننگ ءِ مچ آ پاکستان آن مسلم لیگ (ن) نا کارندہ غاک قائد ءِ جم وجوش اٹ بخیر کیرہ۔ اوپارے کہ پاکستان داوخت آ بھاز انگا تنکی تیٹی تموک ءِ مسلم لیگ (ن) ملک ءِ تنکی آن کشنگ کیک۔ اوپارے کہ الیکشن کمیشن جنوری ٹی لس گچین کاری کرفنگ نا پڑو کرینے اوکان پد مسلم لیگ (ن) نا کارندہ غاک گچین کاری تا پبی تیاری ءِ کیر والیکشن کمیشن نا پڑو نا رداٹ 27 ستمبر آ پوسکن آ حلقہ بندی تا فہرست شائع مریک فہرست آتا شائع مننگ آن پد صوبائی و ڈویژنل عہدیدار و کارندہ غاک فہرست آتا پورو جاچ ءِ ہلیر پوسکن آ حلقہ بندی تیا اعتراض و سلاہ تیار کرسا الیکشن کمیشن اٹ جمع کرفنگے۔