نیویارک۔ 21 ستمبر (اے پی پی) نگراں وزیراعظم انوارالحق کاکڑ پارینے کہ چاگڑدی بدلی نا چیلنج اتون مون تننگ ننا اولیت آتیٹی اوار ءِ، پاکستان آخبت اٹ چاگڑدی بدلی نا چیلنج اتون مون تننگ کن دریائے سندھ نا ڈٹ و ارلی وارننگ نظام نا بابت ڈٹ بندی تون اوار ایلو گام گیج آتے کرینے، 2030ء اسکان پاکستان 60 درسد گیگ بدل توانائی نا ذریعہ غاتے کاریم اٹ اتیک، گلوبل وارمنگ نا برخلاف ہر اسٹ تینا کڑد ءِ ادا کے۔ داخیال آتا درشانی ءِ او چارشنبے آ نیویارک اٹی اقوام متحدہ نا جنرل اسمبلی نا 78 می دیوان نا وخت آ موسمیاتی بدلی تا بابت دیوان آن تران کرسا کرے۔ وزیراعظم پارے کہ چاگڑدی بدلی نا سوب آن پاکستان ءِ مشکل مون تروئی تمنگ ءِ، تدوک آ سال پاکستان اٹ بھسکار نوکاپ بس، گلوبل وارمنگ نا سوب آن پاکستان ءِ قدرتی آفت تون مون تروئی تما، اقوام متحدہ نا سیکرٹری جنرل داوخت آ پاکستان تون پبی یکجہتی نا درشانی ءِ کرے و اقوام عالم ءِ پاکستان نا کمک کن متحرک کرے ہراڑا او نا منت وارا ُن۔ اوپارے کہ کلائمیٹ ریزیلیئنس کن نیشنل ایڈاپٹیشن ڈٹ آ عملدرآمد نا بناءِ کرینے ، دا ڈٹ انا رداٹ آخبت اٹ نوکاپ و قدرتی آفت آتا بھسکاری تتون مون تننگ کن پیدوار کروک ڈٹ آتیٹی غٹ وسیلہ غاتا پبی وڑاٹ کاریم اٹ اتنگک، ارٹ میکو ریسہ ٹی زرکاری نا فراوانی نا فریم ورک اس جوڑ کننگک ہراڑان مخصوص پیدوار مروک بشخ آتیٹی گرج آتا فراوانی ٹی کمک رسینگک۔ وزیراعظم پارے کہ 2025ء انیشیٹیو نا رداٹ دریائے سندھ انا بابت ڈٹ انا بناءِ کرینن، نیشنل ایڈاپٹیشن ڈٹ انا رداٹ ڈیزاسٹررسک مینجمنٹ ننا اولیت ءِ، پاکستان نا ارلی وارننگ لائخی ٹی ودکی کن گام گیج کرینن، جہانی حدت اٹ پاکستان نا بشخ بھاز کم ءِ ولے غٹ آن زیات زہمی مروک آتیٹی اوار ءِ، جہانی حدت ءِ توننگ کن جہانی کوشست آتا بشخ ءِ۔ اوپارے کہ پاکستان 2030ء اسکان تینا توانائی نا 60 درسد گرج گیگ بدل توانائی نا ذریعہ غاتیان دوئی کیک۔
