نیویارک۔ 21 ستمبر (اے پی پی) نگراں وزیراعظم انوارالحق کاکڑ پارینے کہ جہانی کہول آ دینی مرض آتا تالانی نا دروشم اٹ حقوق دانش نا پن اٹ نیزگار ملک آتون غیر منصفانہ روایہ بایدے تخنگپ، کورونا دین انا توننگ اٹ پیش بروک آ ویل آتے دُوارہ دہرائفپننگ کن گام گیج آتا گرج ءِ، دینی مرض آتا توننگ کن ویکسین آتا دستیابی ہر اسٹ کن ممکن کننگ المی ءِ۔ داخیال آتا درشانی ءِ او چارشنبے آ اقوام متحدہ نا جنرل اسمبلی نا 78 می دیوان نا وخت آ دینی مرض آتا توننگ، تیاری و ردعمل نا سرحال آ سمٹ آن تران کرسا کرے۔ وزیراعظم پارے کہ کورونا دین آن کروڑ آ مخلوق زہمی مس، اوفتے لاک ڈاؤن تون مون تروئی تما، جہانی واپار و زرگزران ءِ نسخان رسینگا۔ اوپارے کہ خوش بختی اٹ سائنسدان تا کورونا دین انا ویکسین جوڑ کننگ آن دنیا ٹی اومیت ودی مس، ویکسین نا بشخنگ اٹ بے بریبری مو ن آ بس، نیزگار و ہزگار ملک آتا نیام اٹ دا ویکسین آ زرکاری ٹی پرخ نظر بس۔ اوپارے کہ جہانی و علاقائی کہو ل آ جان جوڑی نا بابت ہلہلہ ئی حالیت آتون مون تننگ کن تیاری کننگے، داڑکن سالانہ 30 ارب ڈالر نا گرج ءِ، جہانی برادری ءِ مون آ بروک آ چیلنج آتون مون تننگ کن مربوط تیاری و کوشست آتا کمک اٹ تینا زمواری تے پورو کروئی مرے تانکہ آخبت اٹ دینی مرض آتیان بچنگ کن گام گیج آتے عملی دروشم اس تننگ مرے۔
