نیویارک ۔ 21 ستمبر (اے پی پی)نگران وزیراعظم انوارالحق کاکڑ اومیت ظاہرکرینے کہ برجاسال ملک انا ہر علاقہ ٹی پولیو دین انا گدریفنگ ءِ توننگ ممکن مریک، حکومت و نیشنل پولیو ٹاسک فورس مچ آ ملک اٹی چناتے پولیو ویکسین، ہروخت نا رکھی ٹیکہ و ایلو المی جان جوڑی نا خذمت آتے سرکننگ کن پورو وڑاٹ سنبرینگوک ءِ۔ چارشنبے نادے آوزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ بل اینڈ ملینڈا گیٹس فاؤنڈیشن نا شریک چیئرمین بل گیٹس تون اقوام متحدہ نا جنرل اسمبلی نا 78 می دیوان نا وخت آ اوڑدہی کرے ہراٹی پولیو نا چٹفنگ، صنفی بریبری، غذائیت و مالیاتی شمولیت آ گپ وتران کننگا۔ وزیراعظم دااومیت نا درشانی ءِ کرے کہ برجاسال ملک انا ہر علاقہ ٹی پولیو دین نا گدریفنگ ءِ توننگ ممکن مریک۔ اوداہیت آ زور شاغا کہ نگران حکومت و نیشنل پولیو ٹاسک فورس مچ آ ملک اٹی چناتے پولیو ویکسین ، ہروخت نا رکھی ٹیکہ و ایلو المی جان جوڑی نا خذمت آتے سرکننگ کن پورو وڑاٹ سنبرینگوک ءِ۔ بل گیٹس دا عزم انا درشانی ءِ کرے کہ پاکستان اٹ پولیو نا چٹفنگ المی ءِ۔ اوخاص وڑاٹ اوغانستان تون سیم پار گدریفنگ ءِ توننگ و سویلی صوبہ خیبرپختونخوا ٹی ویکسی نیشن مہم ءِ برجاتخنگ اٹ است خواہی ظاہرکرے۔ اونیشنل ایمرجنسی آپریشن سینٹر و نگراں حکومت آ ہم پت انا درشانی ءِ کرے کہ اوپولیو دین انا گدریفنگ نا چٹفنگ کن کوشست آتے برجاتخنہ۔ اوپاکستان اٹ غذائیت و مالیاتی شمولیت نا کوشست آتے گچین کننگ کن جدت طرازی و تسلیم شدہ وڑوڈول آتے ودفنگ اٹ وزیراعظم ءِ مخ تفی نا باوری کرفے۔ وزیراعظم و بل گیٹس داہیت آ ہم گپ وتران کریر کہ ہراوڑ دا اولیت آتیٹی گچینی صنفی بریبری نا کوشست آتے گچین کننگ اٹ کمک کیک۔
