اقوام متحدہ نا قرارداد آتا رداٹ کشمیر نا جھیڑہ نا ایسر سویلی ایشیاٹی پائیدار امن کن المی ءِ، اوآئی سی رابطہ گروپ جموں وکشمیر

اقوام متحدہ۔ 21 ستمبر (اے پی پی) اوآئی سی رابطہ گروپ جموں وکشمیر کشمیری تا حق خودارادیت کن کشمیری الس نا انصاف اٹ جہد نا مخ تفی نا درشانی ءِ کرسا داہیت آ زور شاغانے کہ اقوام متحدہ نا قرارداد آتا رداٹ کشمیر نا جھیڑہ نا ایسری سویلی ایشیاٹی پائیدار امن کن المی ءِ۔ چارشنبے نادے آ اوآئی سی نا سیکرٹری جنرل حسین ابراہیم طحہ نا کماشی ٹی او آئی سی رابطہ گروپ جموں و کشمیرنا دیوان مس۔ دیوان اٹ پاکستان، ترکی، سعودی عرب، آذربائیجان و نائیجرنا وزیرخارجہ و بڑزکوکمامدارآک بشخ ہلکر۔ پاکستان نا وزیرخارجہ جلیل عباس جیلانی رابطہ گروپ نا باسک آتے بھارت نا غیرکانودی وڑاٹ مقبوضہ جموںو کشمیر (IIOJ&K)نا سنگین حالیت آتیان معلومدار کرسا پارے کہ متنازع علاقہ ٹی نئی دہلی نا پدریسہ جابرانہ گام گیج ہموجاگہ نا مخلوق کن مہالو آن سنگین انسانی حالیت آتے پین ودفینے۔ جلیل عباس جیلانی اقوام  متحدہ نا جنرل اسمبلی نا 78 می دیوان نا وخت آ رابطہ گروپ نا دیوان ءِپارے کہ ساڑی آ ہندوستانی سرکڑدہ جموں و کشمیر آ ہندوستان نا کوزہ ءِ برقرارتخنگ اٹ لگوک ءِ۔ اوپارے کہ بھارتی کمامدارآک کشمیری تا اوفتا بنداوی حق، خاص وڑاٹ حق خودارادیت نا دوئی کننگ نا جہد ءِ بےدردی اٹ لتاڑنگ ءُ۔  دیوان آن پد جاری مروک آ اسیجائی اعلامیہ ٹی 5 اگست 2019 آن پد کروک آ غٹ غیرکانودی و اسہ کنڈی گام گیج آتے پدی ہلنگ، غیرکانودی وڑاٹ مقبوضہ جموں وکشمیراٹی انسانی حق انا جم، منظم و بھلو کچ اسے آ خلاف ورزی تے توننگ، مقبوضہ علاقہ ٹی غیرکانودی آبادی بدلی تے توننگ و اوفتے پدی ہلنگ نا خواست کننگا۔