نیویارک۔ 20 ستمبر (اے پی پی) وزیرخارجہ جلیل عباس جیلانی پارینے کہ پاکستان وخت انااہم چیلنج آتون مون تننگ ، امن ، سوگوی ، انصاف، بریبری و اسیجائی شونہالی نا تینا وژن ءِ پورو کننگ و اقوام عالم اٹی تینا کڑد ءِ ادا کننگ کن سنبرینگوک ءِ، پاکستان ڈیہہ اٹی پرامن بقائے تین پہ تینی نا خواہندار ءِ، پاکستانی امریکی کمیونٹی امریکہ تون سوگو تعلقداری استوار کننگ نا کوشست آتیٹی اہم کڑد ادا کرینے، سیکورٹی و دفاعی کمکاری پاکستان امریکہ تعلقداری ٹی اہم تمبہ ءِ۔ داخیال آتا درشانی ءِ او نیویارک اٹی اقوام متحدہ نا جنرل اسمبلی نا 78 می دیوان نا وخت آ ایشیا سوسائٹی ٹی ’’پاکستان نا خارجہ پالیسی: امن، سوگوی و اسیجائی شونہالی نا پٹنگ‘‘ نا سرحال آ تران کرساکرے۔ اوپارے کہ نن دہشت گردی و انتہاپسندی نا برخلاف جنگ تننگ نا تینا عزم آ سلوک اُن، پاکستان نا غٹ آن بھلا گڑتی ٹی ٹی پی آن دہشت گردی نا خطرہ ءِ، پاکستان دا باندات آ اوغانستان نا عبوری حکومت تون خڑکی رابطہ ٹی ءِ۔ دہشت گرد آتون جنگ تننگ و شکست تننگ کن پاکستان نا عزم ءِ تالان کرسا اوزور شاغا کہ اوغانستان اٹی گام ءِ جاگہ تروک آ کوشست کروک آ دہشت گرد تنظیم تے ہمسایہ و مچ آ جہانی برادری کن خطرہ تکنگے۔ وزیرخارجہ پارے کہ پاکستان کیہی دہائی آن لکھ آ اوغان مہاجرآتا مہمانداری ءِ کننگ ءِ و او اوغان کمامدار و جہانی برادری تون ااوفتا وطن آ پدی کن کاریم ءِ برجاتخک۔ او پیدوار کرے کہ پاکستان اوغانستان اٹی انسانی حق انا حالیت خاص وڑاٹ زالبول آتا حق، مسن تا تعلیم و زالبول آتا ملازمت نا بابت ویل آتیا جہانی برادری نا گڑتی تیان معلومدار کرے۔
