نیویارک۔ 20 ستمبر (اے پی پی) پاکستان پارینے کہ کینیڈا ٹی رہینگوک سکھ راہشون نا خون اٹی بھارتی کمامدارآتا اوار مننگ نا دوبہ غاتیا بھارت تون 70 سالہ آزموندہ خاص وڑاٹ کلبھوشن یادو نا روشنی ٹی ننکن حیرت نا ہیت اس اف انتئے کہ نن تینا ہمسایہ ملک انا فطرت و طرزعمل ءِ چانہ۔ پاکستان نا سیکرٹری خارجہ سائرس قاضی تدوک آ نن نیویارک اٹی نیوز حوال اٹی اسہ سوج اسے نا ورندی ٹی پارے کہ کینیڈا نا وزیراعظم جسٹن ٹروڈونا بیان کہ اوفتے تون سکھ راہشون ہردیپ سنگھ نجار نا خون اٹی بھارت نا تعلقداری نا متبر شاہدی ارے، دا دوبہ غاک گڑاس راستکی تیا تالان مریرہ ۔ اوبھارت نا ریکارڈ آ ہیت کرسا پارے کہ پاکستان کرملک اٹی پھسات تالان کننگ کن داخل مروک آ بھارت نا جاسوس نیول آفیسر کلبھوشن یادو ءِ حراست اٹ تخا ہرا تینا ڈوہ ءِ امنا کرے۔ اوپارے کہ کینیڈا نا وزیراعظم نا کنڈآن دوبہ غاک بھارت تون 70 سال انا آزموندہ ءِ مون آتخسا ننکن حیرانگی نا ہیت اس اف۔ اوپارے کہ اگہ ملک اس بھارت ءِ پہہ مریک تو او نن اُن، ننا بھارت تون 70 سال انا آزموندہ ءِ، پاکستان فروری 2019اٹی تینا دفاع کن بھارت نا سنیک اٹیک نا ورندی ءِ تسوسس دا ایہن چنکو ہیت اس اف۔ اوپارے کہ ننا ہمسایہ ملک ننے آن ہفت گنا بھلن ءِ، ولے بھارت دُوارہ دُن کرے تو نن ولدا پبی تینا دفاع ءِ کینہ۔
