نیویارک۔ 20 ستمبر (اے پی پی) نگران وزیراعظم انوارالحق کاکڑ پارینے کہ پدتموک ملک آتے شونداری نا ہدف آتا دوئی کننگ اٹ وسیلہ غاتا کمتی مون تروک ءِ ، پائیدار شونداری کن اسہ وڑ شونداری المی ءِ ، کوویڈ۔ 19 نا جہانی دین، موسمیاتی بدلی و جھیڑہ غاتا چندی تنکیک پدتموک ملک آتا زرگزران ءِ بھس کرینو، آمدہ کوپ ۔ 28 اٹی پاکستان موسمیاتی انصاف خاص وڑاٹ 100 ارب ڈالر کلائمیٹ فنڈ آتا فراوانی نا پڑو آ عملدرآمد ناخواہندار ءِ۔ اونیویارک اٹی ایس ڈی جیز سروک آتیٹی فنانس و زرکاری ءِ متحرک کننگ و ایس ڈی جیز نا دوئی کننگ کن نفاذ نا ذریعہ نا ڈائیلاگ 6 اٹی گپ وتران کریکہ۔ داڑے ملوک آ پریس ریلیز نا رداٹ نگران وزیراعظم وسیلہ و زرکاری نا بابت ایس ڈی جیز سمٹ لیڈرز ڈائیلاگ اٹی بشخ ہلک۔ 18 آن 19 ستمبر اسکان مروک آ ایس ڈی جیز سروکی دیوان 2030 نا ایجنڈا و پائیدار شونداری نا ہدف آتا دوئی کننگ کن کوشست آتا پیدواری ءِ کیک۔ وزیراعظم تینا خیال آتا درشانی ءِ کرسا داہیت ءِ مون آتخا کہ ایجنڈا 2030 ءِ تینا کننگ نا 8 سال آن پد ایس ڈی جی ہدف آتا دوئی کننگ آ بیرہ 12 درسد پیش رفت مننگ کرینے۔ زرگزرانی ناہمواری پائیدار شونداری نا ہدف آتا دوئی کننگ اٹ غٹ آن بھلا اڑاند ءِ۔ پائیدار شونداری نا ہدف آتا دوئی کننگ کن پدتموک ملک آتے وسیلہ فراوان کروئی مریک۔ کوویڈ۔ 19 نا جہانی دین ، موسمیاتی و جھیڑہ غاتا چندی تنکیک پدتموک ملک آتا زرگزران تے بھس کرینو۔ نیزگاری و غذائی رکھ اٹ دا جھیڑہ غاتا سوب ودکی مسنے وخت اس کہ داٹی اخلاقی وڑاٹ خواتہ جہانی مالیاتی پنجر نا سوب آن پین ودکی مسنے۔ وزیراعظم زور شاغسا پارے کہ بروک آ کوپ۔ 28 اٹی پاکستان موسمیاتی انصاف نا خواہندار ءِ ہراٹی مومسیاتی فنانس اٹی سالانہ 100 ارب ڈالر آن زیات نا فراوانی نا قول انا پوروی اونا نصف بشخ موسمیاتی موافقت کن جتا کننگ و نسخان تیکن فنڈ انا دمدستی بنااوار ءِ۔ وزیراعظم ایس ڈی جیز سروک دیوان نا اعلامیہ ٹی پاکستان و ایلو پدتموک ملک آتا کنڈآن پیش کروک بھاز انگا سلاہ تے اوار کننگ نا خیرمقدم کرے۔ اوفتے ٹی کثیر الجہتی شونداری بینک آتا زوت زرکاری ، خصوصی ڈرائینگ رائٹ نا دُوارہ چینلنگ، جہانی مالیاتی فن تعمیر نا شونداری و اصلاحات و سیکرٹری جنرل نا ایس ڈی جیز محرک نا توثیق اوار ءِ ۔ وزیراعظم دامعاہدہ غاتیا دمدستی عملدرآمد ءِ پک کننگ کن جنرل اسمبلی نا ورکنگ گروپ اس جوڑ کننگ نا سلا ہ تس۔
