نگراں وزیراعظم انوارالحق کاکڑ نا اقوام متحدہ نا جنرل اسمبلی نا دیوان نا وخت آ ایران نا صدر ابراہیم رئیسی تون اوڑدہی

نیویارک۔ 19 ستمبر (اے پی پی) نگراں وزیراعظم انوارالحق کاکڑ پاکستان وایران نا نیام اٹ خڑکی ایلمی تعلقداری خاص وڑاٹ اقتصادی بشخ اٹی کمکاری ءِ ودفنگ آ چکار کرسا دا تعلقداری تے پین سوگو و گہرا کننگ نا حکومت نا پکا عزم انا درشانی ءِ کرینے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ نگراں وزیراعظم نیویارک اٹی  اقوام متحدہ نا جنرل اسمبلی نا 78 می دیوان نا وخت آ اسلامی جمہوریہ ایران نا صدر ابراہیم رئیسی تون ہڑتوم آ کنڈآتا اوڑدہی کرے۔ اوڑدہی ٹی ہڑتوم آ ہمسایہ ملک آتا نیام اٹ خڑکی ایلمی تعلقداری آ زور شاغسا وزیراعظم خاص وڑاٹ اقتصادی بشخ اٹی کمکاری ءِ ودفنگ آ چکار کرسا دا تعلقداری تے پین سوگو و گہرا کننگ نا پاکستان نا پکا عزم انا درشانی ءِ کرے۔ وزیراعظم زور شاغسا پارے کہ مند۔ بارڈر سیمی مارکیٹ نا ساڑی آ بناتون اوار ایلو گام گیج نئے بیرہ سیمی علاقہ غاتا زرگزرانی شونداری ٹی کمکار مریک بلکن ہڑتوم آ ملک آتا مخلوق نا گچینی کن کاریم کننگ نا اجتماعی عزم انا پیدوار درشانی نا وڑاٹ کاریم کیک۔ ایرانی صدر ابراہیم رئیسی نا ’’ہمسایہ غٹ آن مہالو’’ نا پالیسی علاقائی شونداری و رابطہ  کن پاکستان نا وژن تون پورو وڑاٹ ہم گرنچ ءِ، وزیراعظم ہڑتوم آ ملک آتیکن تینا یکتا جغرافیائی محل ووقوع آن فائدہ ہرفسا علاقائی امن و شونہالی نا اسیجائی مسخت آتے مون آ دننگ  و علاقائی رابطہ غاتے ودفنگ نا اہمیت آ زور شاغا۔ پاک ایران تعلقداری ٹی بڑزکو کہول انا باقاعدہ تبادلہ، اہم علاقائی و جہانی امور آ یکسانیت و تین پہ تینی است خواہی  نا غٹ بشخ آتیٹی سوگو کمکاری اوار ءِ۔