نیویارک۔ 19 ستمبر (اے پی پی) نگراں وزیراعظم انوارالحق کاکڑ پارینے کہ پائیدار شونداری ہدف آتا دوئی کننگ کن 5 اہم بشخ خور انا پیدوار، بنداوی پنجر اٹی زرکاری، صنعت کاری، جان جوڑی نا ہُننگ نا لچکدار نظام و ڈیجیٹل تقسیم ءِ چٹفنگ نا بابت گام گیج المی ءِ۔ ایس ڈی جیز آ پیش رفت ءِ کووڈ، تنازعات و موسمیاتی بدلی نا چندی تنکی تا سوب آن بھلو دھچکہ اس لگانے۔ چین نا بیلٹ اینڈ روڈ انیشیٹو و چین پاکستان اقتصادی راہداری پائیدار شونداری ہدف آتا دوءی کننگ اکن اہم ءُ ذریعہ اسے۔ سے شنبے نادے آ وزیراعظم آفس نا میڈیا ونگ آن جاری کروک بیان نا رداٹ نگراں وزیراعظم انوارالحق کاکڑ گلوبل ڈویلپمنٹ انیشیٹو(جی ڈی آئی) کمکاری نا نتیجہ غاتیا اسہ بڑزکو کہولی دیوان اسے ٹی بشخ ہلک۔ جی ڈی آئی نا سلاہ چینی صدر شی جن پنگ 20 ستمبر 2022 آ تسوسس۔ دیوان اٹی گپ وتران کرسا وزیراعظم داہیت ءِ مون آ تخا کہ پائیدار شونداری ہدف (ایس ڈی جیز) نا دوئی کننگ نا کنڈآ پیش رفت ءِ کوویڈ، تنازعات و موسمیاتی بدلی نا چندی تنکی تا سوب آن بھلو دھچکہ اس لگانے۔ اوجی ڈی آئی کن پاکستان نا مخ تفی نا درشانی ءِ کرے و اونا نفاذ آن دوئی کروک آ سنگ میل انا ستاءِ کرے۔ وزیراعظم زور شاغا کہ چین نا بیلٹ اینڈ روڈ انیشیٹیو و چین پاکستان اقتصادی راہداری ایس ڈی جیز نا دوئی کننگ کن اہم ءُ ذریعہ اسے۔ او5 اہم بشخ آتیٹی گام گیج نا گرج ءِ مون تخا، دا بشخ آتیٹی خور انا پیدوار ، بنداوی پنجر نا زرکاری، صنعت کاری، جان جوڑی نا ہُننگ نا لچکدار نظام و ڈیجیٹل تقسیم ءِ چٹفنگ اوار ءِ۔ وزیراعظم شونداری عمل نا غٹ کہول آتیا جوان زرکاری نا گرج ءِ پین تالان کرے و صدر شی جن پنگ نا کنڈآن جی ڈی آئی نا نفاذ کن 10 ارب ڈالر نا اسہ پین فنڈ اسے نا جوڑ کننگ نا پڑو نا خیرمقدم ءِ کرے۔ وزیراعظم پارے کہ پاکستان چین و گروپ آف فرینڈز آف جی ڈی آئی نا ایلو باسک آتون تینا کمکاری ءِ ودفنگ نا چاری ءِ تانکہ ایس ڈی جیز آ وعملدرآمد کن اوفتا اجتماعی است خواہی ءِ پورو کننگ مرے۔ دود اٹی چین نا نائب صدر ہان ژینگ، اقوام متحدہ نا جنرل اسمبلی نا صدر ڈینس فرانسس و ایلو بڑزکو عہدیدارآک تران کریر۔ داوخت آ ڈی جی آئی کمکاری آ اسہ ویڈیو حوال و پریزنٹیشن اس ہم پیش کننگا۔
