وزیرخارجہ جلیل عباسی جیلانی نا سعودی ہم منصب شہزادہ فیصل بن فرحان السعود تون اوڑدہی، زرگزران، واپار، توانائی و زرکاری ٹی تین پہ تینی کمکاری ءِ پین گہرا کننگ آ امنا

نیویارک۔ 20 ستمبر (اے پی پی) وزیرخارجہ جلیل عباس جیلانی و اونا سعودی ہم منصب شہزادہ فیصل بن فرحان السعود نا نیام اٹ اقوام متحدہ نا جنرل اسمبلی نا 78 می دیوان نا وخت آ اوڑدہی مس۔ اوڑدہی ٹی ہڑتوم آ وزیرخارجہ غاک پاکستان سعودی عرب تعلقداری نا اہمیت آ زور شاغسا غٹ بشخ خاص وڑاٹ زرگزران، واپار، توانائی و زرکاری ٹی تین پہ تینی کمکاری ءِ پین گہرا کننگ آ امنا کریر۔ سے شنبے نادے آ مروک آ اوڑدہی ٹی ہڑتوم آ وزیرخارجہ غاک ہڑتوم آ کنڈآتا تعلقداری نا چندی پلوآتون اوار اوار تین پہ تینی است خواہی نا علاقائی و جہانی امور تیا گپ وتران کریر۔ وزیرخارجہ جلیل عباس جیلانی سعودی سرکڑدہ غاتا پاکستانی نا است بھلنی و بدل مفروک مخ تفی آ منت واری ءِ ہرفے۔ اوسعودی وزیرخارجہ ءِ خصوصی  سرمایہ کاری سہولت کونسل (ایس آئی ایف سی) نا جوڑ کننگ آن معلومدار کرے تانکہ جی سی سی نا باسک ملک خاص وڑاٹ مملکت سعودی عرب نا ممکنہ زرکاری ءِ آسان و ترند تر جوڑ کننگ مرے۔ اوداہیت آ زور شاغا کہ آئی ٹی ، انرجی، انفراسٹرکچر و لیبر تون اوار اہم بشخ آتیٹی پاک سعودی کمکاری ءِ ودفنگے۔ وزیرخارجہ 20 لکھ آن زیات پاکستانی پردیسی تا مہمانداری آ سعودی ہم منصب نا منت واری ءِ ہرفے۔ شہزادہ فیصل بن فرحان آل سعود ہڑتوم آ ملک آتا نیام اٹ ایلمی تعلقداری و مملکت نا شونداری ٹی پاکستانی کمیونٹی نا کڑد  ءِ مو ن آتخا۔ وزیرخارجہ داہیت انا درشانی ءِ کرے کہ پاکستان سعودی ولی عہد و سعودی مملکت نا وزیراعظم نا دورہ ءِ پاکستان نا بے چینی اٹ چاری ءِ۔ پاکستان و سعودی عرب ایلمی تعلقداری نا پابند ءُ ہرا تین پہ تینی پت و افہام و تفہیم ، خڑکی کمکاری و اسہ ایلو تون تفنگ ناآخبتی روایت آ تالان  ءِ۔