نیویارک۔ 20 ستمبر (اے پی پی) وزیرخارجہ جلیل عباس جیلانی اقوام متحدہ نا جنرل اسمبلی نا 78 می دیوان نا وخت آ نیویارک اٹی کیوبا نا ہم منصب برونوروڈریگوزپاریلاتون اوڑدہی کرے۔ چارشنبے نادے آ دفترخارجہ نا رداٹ فریق آک اوڑدہی ٹی ہڑتوم آ کنڈآتا، کثیرالجہتی و علاقائی امور نا گیشتر رینج آ گپ وتران کریر۔ وزیرخارجہ پارے کہ پاکستان و کیوبا نا نیام اٹ چندی علاقائی و جہانی امور آ اسیجائی خیال آتا تخوک گچین تعلقداری ءِ۔ اوکثیر الجہتی فورم خاص وڑاٹ اقوام متحدہ، غیروابستہ ملک انا تحریک و جی 77 و چین نا نیام اٹ خڑکی کمکاری نا ستاءِ کرے۔ وزیرخارجہ 2005 اٹی پاکستان اٹ بروک آ بھسکار زمی جمب آن پد کیوبا نا کنڈآن تروک آ طبی امداد آ پاکستانی الس نا است انا حب اٹ منت واری ءِ ہرفے۔ وزیرخارجہ جیلانی 2023اٹی جی 77 و چین نا کماشی ٹی کویبا کن پاکستان نا مخ تفی نا درشانی ءِ کرے و کیوبا نا وزیر خارجہ ءِ 15 و 16 ستمبر آ ہوانا ٹی اڈ ہلوک جی 77 و چین نا سروکی دیوان نا سرسہب اڈتننگ آ مبارکبادی تس۔ ہڑتوم آ وزیرخارجہ غاک تین پہ تینی است خواہی نا بشخ خاص وڑاٹ واپار، بائیو ٹیکنالوجی ، جان جوڑی و تعلیم نا بشخ آتیٹی ہڑتوم آ کنڈآتا تعلقداری تے پین ودفنگ نا گرج آ امناکریر۔
