سی پیک نا رداٹ پاکستان و چین نا نیام اٹ ہڑتوم آ کنڈآتا تعلقداری بےکچ یکتا، ہڑتوم آ کنڈآتا کٹنگ نا عنصر اوار مرے تو بے سہبی نا گمان کم مریک، حسن داؤد بٹ

اسلام آباد۔ 20 ستمبر (اے پی پی) زرکاری بورڈ خیبرپختونخوا نا مسکوہی چیف ایگزیکٹیو آفیسر و سینئر ایڈوائزر انرجی چائنہ و مسکوہی سی پیک پروجیکٹ ڈائریکٹر ڈاکٹر حسن داؤد بٹ پارینے کہ سی پیک نا رداٹ پاکستان و چین نا نیام اٹ ہڑتوم آ کنڈآتا تعلقداری بے کچ یکتا ءِ ، ہراتم تعلقداری اسے ٹی ہڑتوم آ کنڈآتاکٹنگ نا عنصر اوار مرے تو اوٹی بے سہبی نا گمان کم مریک۔ داخیال آتا درشانی ءِ او چارشنبے نادے آ اے پی پی تون خصوصی گپ وتران کرسا کرے۔ اوپارے کہ دنیا نا حالیت آتیان ایڑتر ہڑتوم آ ملک آتا ہڑتوم آ کنڈآتا تعلقداری بے کچ سوگو و خوشگوار مسنے و ہڑتوم آ ملک آتا است خواہی ءِ کہ اسہ ایلو ءِ سوگو کننگے۔ حسن داؤد بٹ پارینے کہ سی پیک نارداٹ مچ آ پاکستان اٹی مریس مدتی و نیام مدتی ڈٹ آتیا تعمیراتی کاریم ترندی اٹ برجاءِ، ہڑتوم آملک آک سی پیک نا رداٹ اسہ ایلو نا آزموندہ غاتیان بھاز فائدہ ہرفینو۔ اوپارے کہ وخت گدرینگ انگ تون اوار اوار سی پیک نا بھرمک مون آ بریرہ انتئے کہ دانا مسخت ہندادے کہ ہڑتوم آملک آک زرگزرانی وڑاٹ سوگو مریر و علاقائی کہول آ اسہ ایلو تون گنڈوک مریر۔ اوپارے کہ ہڑتوم آ ملک آک سوگو سنگت ءُ، اوفتا زرگزرانی تعلقداری سوگو مننگ ءُ و ہڑتوم آ کنڈآتا السی رابطہ ہم مون آ ہِننگ ءِ۔ حسن داؤد بٹ پارے کہ سی پیک نا ڈت 2030ء اسکان برجاسلک ہرانا اولیکو ریسہ ٹی بنداوی پنجر نا تفنگ و توانائی نا ڈٹ آتیا کاریم کننگا۔