اقوام متحدہ نا جنرل اسمبلی ٹی کشمیر نا ویل انا بابت پاکستان نا موقف ءِ پبی وڑاٹ پیش کیوہ، نگراں وزیراعظم انوارالحق کاکڑ نا نجی ٹی وی چینل ءِ انٹرویو

اسلام آباد۔ 18 ستمبر (اے پی پی) نگراں وزیراعظم انوارالحق کاکڑ پارینے کہ الس نا تکلیف آتا درک ءِ، ویل آتا ایسری کن کوشست کننگ اُن، خراج نظام اٹ گچینی آن الس ءِ ریلیف ملک، گچین کاری تا نتیجہ ٹی جوڑ مروک آ حکومت ءِ اقتدار ءِ منتقل کینہ، اقوام متحدہ نا جنرل اسمبلی ٹی کشمیر نا ویل انا بابت پاکستان نا موقف ءِ پبی وڑاٹ پیش کیوہ، نوازشریف نا وطن واپسی ٹی ہچ ءُ اڑاند اس اف، اونا باندات عدالت اٹ مننگ آ عدالت آک اوڑا فیصلہ کیرہ، انتظامی گام گیج آتا سوب آن ڈالر نا نہاد اٹی کمتی، کھد ، بورہ تون اوار ایلو کنوئی آ گڑاتا اسمگلنگ نا توننگ اٹ کمک رسینگانے۔ داخیال آتا درشانی ءِ او امریکہ روانگی آن مست نجی ٹی وی چینل اسے انٹرویو ترساکرے۔ وزیراعظم پارے کہ جہانی کہول آ خام تیل انا نہاد آتا رداٹ پیٹرول نا نہاد آتا تعین ءِ کننگک، بدبختی اٹ جہانی منڈی ٹی تیل انا نہاد آتیٹی ودکی مننگ ءِ، پاکستان کون آ ملک آتیکن دا بھلو چیلنج اسے، السی برانز نا بابت میڈیا نا اسہ بشخ اس کنابیان ءِ سٹی تینے آن بیان کرے، ہراہیت ءِ کننگپ او تہمت و صحافتی بددیانتی نا زمرہ ٹی بریک، اومیت ءِ کہ میڈیا ٹی ہم اخلاقیات و ضابطہ اخلاق آ عمل کننگک۔ اوپارے کہ خراب خراج نظام نا سوب آن الس ءِ مشکل مون تروک ءِ، ننے تینا خراج نظام اٹی گچینی اتنگ نا گرج ءِ، انتئے کہ کیہی دہائی آن خراج نا نظام اٹی اصلاحات کننگتنے۔ انتظامی گام گیج آتا سوب آن روپئی سوگو مسنے، دا ننا غٹ انا کریڈٹ ءِ، او پارے کہ پاک فوج انا نظام ایلو ادارہ غاتا مقابلہ ٹی سوگو ءِ، آرمی چیف آئین نا عملداری نا پبی مخ تف ءِ، سویلین ادارہ غاتا کاریم نا کچ اٹی ودکی وکارکڑد اٹی گچینی آ چکار ءِ۔ اوپارےکہ پوریاگر برادری ءِ زرکاری و کاروبار نا بارواٹی رکھ انا خواہندار ءُ تانکہ اوفتے سازگار و کاروبار دوست چاگڑد دُوبرے۔ اوپارے کہ ریاست نا فائدہ غاتیٹی گڑاس وخت مشکل و تلخ فیصلہ کروئی تمک، دا منصب نا خواست مریک۔ الس آ کم آن کم بھاریم  شاغنگ کن کوشست کننگ اُن۔ الس کارکڑد نا بنداو آ تینا نمائندہ غاتے گچین کیرہ۔