نگراں وزیراعظم انوارالحق کاکڑ نیویارک آ سرمس،22 ستمبر آ اقوام متحدہ نا جنرل اسمبلی نا 78 می دیوان آن تران کیک

نیویارک۔ 19 ستمبر (اے پی پی) نگراں وزیراعظم انوارالحق کاکڑ نیویارک آ سرمس۔ جان ایف کینیڈی انٹرنیشنل ایئرپورٹ آ اقوام متحدہ ٹی پاکستان نا آخبتی مندوب سفیر منیر اکرم ، اقوام متحدہ ٹی پاکستان نا سفیر مسعود خان، نیویارک اٹی قونصل جنرل عامراحمد اتوزئی وایلو کمامدارآک اودے بخیرکریر۔ نگراں وزیراعظم اقوام  متحدہ نا جنرل اسمبلی نا 78 می دیوان اٹی پاکستانی ڈل انا کماشی ءِ کیک۔ دیوان اٹی کم و و د 150 جہانی راہشون بشخ ہلیرہ۔ وزیراعظم 22 ستمبرآ جنرل اسمبلی نا دیوان آن تران کروک آ اولیکو پاکستانی نگرانی وزیراعظم مریک۔ 19 آن 26 ستمبر اسکان مروک آ اسمبلی نا بڑزکوکہولی دیوان نا وخت آ اقوام متحدہ نا احاطہ و اونا چارمہ کنڈ آ بھلو کچ اسے آ رکھی گام گیج کننگانے۔ اومیت ءِ کہ تینا تران اٹی نگراں وزیراعظم انوارالحق کاکڑ جموں و کشمیر نا جھیڑہ تون اوار چندی علاقائی و عمومی ویل آتیا پاکستان نا نقطہ نظر ءِ پیش کیک۔ او تینا نگراں انتظامیہ نا کنڈآن ملک انا زرگزرانی بحالی ءِ سوگو کننگ و ملکی و پیشن نا زرکاری ءِ متحرک کننگ نا کوشست آتا بارواٹی ہم سرجمی اٹ مون آ تخک۔ داکان بیدس وزیراعظم چندی ملک آتا ہم منصب، جہانی تنظیم آتا سروک، آسودہی تنظیم و کارپوریٹ راہشون آتون ہڑتوم آ کنڈآتا اوڑدہی کیک۔ وزیرخارجہ جلیل عباس جیلانی مہالو آن نیویارک آ سرمسنے۔ وزیراعظم انوارالحق کاکڑ اقوام متحدہ نا جنرل اسمبلی ٹی پاکستان نا نمائندگی ءِ کروک آ اولیکو عبوری وزیراعظم مریک۔