بھارت و پاکستان 20-21ستمبر آ کشن گنگا ایشوپردی ہیگ اٹی تینا تینا موقف ءِ پیش کیرہ، سینیٹر عبدالقادر

کوئٹہ۔ 19 ستمبر (اے پی پی) چیئرمین اسٹینڈنگ  کمیٹی پیٹرولیم و رسورسز و سیاسی و اقتصادی امور نا چاہندار سینیٹر محمد عبدالقادر اسہ خصوصی ءُ بیان اسے ٹی پارینے کہ بھارت و پاکستان برجاتُو 20 و 21 ستمبر آ دی ہیگ اٹی بے کنڈ ہلوک ماہر نا یک باسکی عدالت اٹ پیش مرسا 330 میگاواٹ کشن گنگا و 850 میگاواٹ ریٹل ہائیڈرو پاور پروجیکٹ نا متنازعہ ڈیزین آ پیش مرسا تینا وضاحت ءِ ایترہ۔ ہڑتوم آ ملک آک دا بے کچ اہم باندات آ اسہ وار ولدا جہانی عدالت اٹ مون پہ مون مریرہ، داباندات آ پاکستان نا سرسہبی نا بھلو گمان اسے، اوپارے کہ بھارت ہفت باسکی پی اے سی مقدمہ تون مون تننگ آن خلینگ ءِ ہراڑے اودے تینا پک باتننگ نا گڑتی ءِ۔ بھارت دا پروجیکٹ آتا تفنگ پاکستان نا دریاجہلم و چناب آ کننگ ءِ، عدالت اٹ پاکستان نا وکالت ءِ کمشنر سندھ طاس ، اٹارنی جنرل دفتر نا کمامدار و جہانی وکیل آتا ٹیم کیک، بے کنڈہلوک نا عدالت تدوک آ 27 و 28 فرور ی نا کارروائی ٹی مقدمہ نا سماعت نا ضابطہ کار طے کریسس، کشن گنگا پروجیکٹ دریائے جہلم آ و ریٹل پروجیکٹ، دریائے چناب آ تفنگ انگ ءِ، اوپارے کہ پاکستان آ مقدمہ بھارت نا است خواہی آ ورلڈ بینک انا کنڈآن جوڑ غیرجانبدار ماہر نا عدالت ثالثی نا مستقل عدالت (پی سی اے) ٹی مون تننگ ءِ، بھارت 7 باسکی پی اےسی ٹی مقدمہ تون مون تننگ آن خلینگ ءِ، تدوک آ 7 جولائی آ دی ہیگ نا آخبتی عدالت تینا دائر کار بھارت نا ہرفوک آ 6 اعتراض آتے یکسر مسترد کریسس، و سماعت کن تینا اختیار نا پڑو ءِ کریسس، داوخت آپاکستان نا موقف  ءِ امنا کننگا، و بھارت داوخت آسماعت آن غائب ئس، چیئرمین قائمہ کمیٹی مستی پارے کہ پاکستان اسہ پرامن ءُ ملک اسے و تینا غٹ متنازعہ باندات آتا پرامن ایسری اس خواہک۔ پاکستان اسیجائی ویل آتا ایسری کن ڈائیلاگ آ زور شاغک۔ پاکستان نا اصولی موقف ءِ کہ جنگ ویل آتا ایسر اف۔ ویل آتا ایسری کن فریق آتے معروضی حالیت و راستکی تے مون آ تخسا مون آ ہنوئی مریک۔ پاکستان تینا حق آ بھارتی ڈاکہ ءِ سگپک، پاکستان ہڑتوم آ کنڈآتا ویل آتا ایسری کن سنجیدہ پارٹنر نا کڑد ءِ ادا کننگ ءِ و بھارت آن ہم ہندا سنجیدگی نا خواست ءِ کیک۔ داہیت ءِ ملحوظ خاطر تخنگے کہ پاکستان نا امن پسندی ءِ پاکستان نا نزوری تکنگپ۔