اقوام متحدہ نا تہذیب آتا سیوت مذہب و عقیدہ نا بنداو آ مروک آ اسلاموفوبیا، تعصب و امتیازی سلوک نا توننگ کن کوشست آتے ترند کے، نگراں وزیرخارجہ جلیل عباس جیلانی

اقوام متحدہ۔ 18 ستمبر (اے پی پی) نگراں وزیرخارجہ جلیل عباس جیلانی جمعہ نادے  اقوام متحدہ نا تہذیب آتا سیوت (یواین اے اوسی) آ زور شاغا کہ او مذہب و عقیدہ نا بنداو آ مروک آ اسلاموفوبیا ، تعصب و امتیازی سلوک نا توننگ کن کوشست آتے ترند کے۔ نیویارک اٹی اقوام متحدہ نا جنرل اسمبلی نا 78 می دیوان نا وخت آ یواین اے او سی نا بڑزکو نمائندہ میگوئل موراٹینوس تون اوڑدہی ٹی گپ وتران کرسا وزیرخارجہ داہیت آزورشاغا کہ جہانی کہول آ مذہبی بے سگی و اسلاموفوبیا ودنگ ءِ۔ اوڑدہی ٹی، ہڑتوم آ راہشونک یواین اے او سی نا مینڈیٹ ، کاریم و کمکاری نا ممکنہ بشخ، خاص وڑاٹ اسلاموفوبیا  و بے سگی نا مقابلہ ءِ کننگ نا بارواٹی سرجمی اٹ گپ وتران کریر۔ وزیرخارجہ سیوت و بڑزکو نمائندہ نا کنڈآن کروک آ قابل قدر کاریم نا ہم ستاءِ کرے۔ دارداٹ اوبے کنڈ ہلوک و جوان رپورٹنگ نا اہمیت آ زو ر شاغا۔ بین المذاہب و بین الثقافتی مکالمہ و ہندی، قومی و جہانی کہول آ خیال آتا تبادلہ نا است بڈی ءِ کرسا، بڑزکو نمائندہ پدریسہ گپ وتران ءِ مون آ دننگ و اسلاموفوبیا تون مون تننگ نا وڑوڈول آتون اوار تین پہ تینی و افہام تفہیم ءِ مون آ دننگ کن یواین اے اوسی نا تیاری تا درشانی ءِ کرے۔ 2005 اٹی جوڑ کروک آیواین اے او سی نا بنداوی مسخت آتیان اسہ غٹ دودوربیدہ ، روایت و مذہبی عقیدہ غاتیکن تین پہ تینی شرف ءِ مون آ دننگ ءِ۔ دا اختلاف آتے چٹفنگ و بین المذاہب و بین تہذیبی اختلاف ءِ چٹفنگ کن اسہ پلیٹ فارم اسے نا وڑاٹ کاریم کیک۔ وزیرخارجہ نگراں وزیراعظم انوارالحق کاکڑ نا کماشی ٹی  اقوام متحدہ نا جنرل اسمبلی نا 78 می دیوان اٹی بشخ ہلوک آ پاکستانی ڈل انا بشخ ءِ۔