پاک فضائیہ نا دستہ نا فضائی مشق شاہین۔ 10 اٹی سرسہب بشخ ہلنگ آن پد وطن آ پدی سرمس

اسلام آباد۔ 19 ستمبر (اے پی پی) پاک فضائیہ نا دستہ چین اٹی شاہین 10 فضائی مشق اٹی سرسہب بشخ ہلنگ آن پد وطن آ پدی سرمس۔ پدی بننگ آ فضائیہ نا دستہ پاکستان ایئرفورس انا اسہ آپریشنل ایئر بیس آ لینڈنگ کرے۔ پاک فضائیہ نا دستہ ٹی اوار جے۔10 سی و جے ایف ۔ 17 تھنڈرجنگی جہاز، جنگی پائلٹ، ایئر ڈیفنس کنٹرولرو تکنیکی گراؤنڈ عملہ مشق اٹی پبی بشخ ہلکر۔ ترجمان پاک فضائیہ نا رداٹ مشق انا کمک اٹ ہڑتوم آ سٹریٹجک سیوتی تا نیام اٹ حقیقت آ تالان ساڑی آ دور انا فضائی جنگ انا منظر نامہ غاتے مون آ تخسا تین پہ تینی کارروائی تا توثیق ممکن مس۔ شاہین۔ 10 ، شاہین فضائی  مشق آتا سیریز اٹی 10 می مشق ءِ و دا فضائی مشق انا مہمانداری ءِ ہڑتوم آ ملک آک ہرسال گیگ بدل بنداوتیاکیرہ۔ پاک فضائیہ و پیپلز لبریشن آرمی ایئر فورس انا نیام اٹ  فضائی مشق آتا دا چرجوئی  اوفتا پائیدار شریداری تون گنڈوک ءِ۔ تین پہ تینی کمکاری آ تالان دا مشق آک نئے بیرہ بڑزکو بصیرت و ہیلکاری اسباق نا تبادلہ ٹی کمک تس، بلکن ہڑتوم آ فضائی فوج آتا جنگی عملہ نا نیام اٹ اسیجائی کارروائی تا مو ن آ دننگ اٹ ہم جوان ءُ کڑد اس اداکرے۔ پاک فضائیہ نا عملہ نا فنی مہارت و جے۔ 10 سی وجے ایف۔ 17 تھنڈر جہاز آتا زبردست فضائی جنگی لائخیک پاک فضائیہ ءِ دا چیلنج آتیان پبی مشق اٹی نمان کارکڑد نشان تننگ اٹ اہم ءُ کڑ د اس اداکریر ۔ شاہین فضائی مشق آتیٹی پاک فضائیہ نا ایئروگراؤنڈ عملہ نا سرسہب بشخ ہلنگ، پاک فضائیہ نا کنڈآن اسیجائی چیلنج آتون مون تننگ و فضائی جنگ انا بابت رونما مروک آ ساڑی آ بدلی تا رداٹ تینا کارندہ غاتا آپریشنل تربیت نا پبی عزم انا شاہدی ءِ۔