چیف جسٹس قاضی فائز عیسیٰ نا سپریم کورٹ آ بننگ آ عملہ تون گپ وتران

اسلام آباد۔ 18 ستمبر (اے پی پی) چیف جسٹس آف پاکستان جسٹس قاضی فائز عیسیٰ نا سپریم کورٹ آ بننگ آ سپریم کورٹ نا عملہ اودے بخیر کرے و گلدستہ اس پیش کرے۔ چیف جسٹس بیابخیری آ سپریم کورٹ نا عملہ نا منت واری ءِ ہرفسا پارے کہ نما غٹ انا کمک اٹ اواری اٹ کاریم کینہ۔ اوپارے کہ اینو اولیکو دے چندی میٹنگ آک ءُ، ای نمتون ولدا ملیوہ۔ چیف جسٹس سپریم کورٹ نا عملہ غا پیدوار کرے کہ عدالت آتیٹی مخلوق تینا جنگ و جھیڑہ و ویل آتا چٹفنگ کن بریک، نم عدالت آ بروک آتون ہندن ءُ سلوک کبو کہ دُن کہ میزبان تینا مہمان تون کیک۔ چیف جسٹس قاضی فائز عیسیٰ پارے کہ مخلوق فریشانی نا عالم اٹ عدالت آ بریک ، نم انصاف نا درگہ غاتے ملوک تخبو و ہراڑسکان مننگ کرے اوفتا کمک ءِ کبو۔ اوملازم آتے پارے کہ نم تون ولدا سرجم ءُ اوڑدہی اس  مریک۔ چیف جسٹس قاضی فائز عیسیٰ نا کماشی ٹی عدالت عظمیٰ نا فل کورٹ دیوان اڈ ہلک ہراٹی سپریم کورٹ نا غٹ جج آک ساڑی ئسر۔