وزارت مذہبی امور نا کنڈآن 48می 2دے ئی جہانی سیرت النبی ﷺ کانفرنس 11 و 12 ربیع الاول آ اڈ ہلیک، مقابلہ مقالہ و کتاب سیرت و نعت نا انعام یافتگان آتیٹی انعام بشخنگک

اسلام آباد۔ 18 ستمبر (اے پی پی) وزارت مذہبی امور نا کنڈآن 48 می 2دے ئی جہانی سیرت النبی ﷺکانفرنس 11 و 12 ربیع الاول (28 و 29 ستمبر) آ اسلام آباد اٹی اڈ ہلیک، دا کانفرنس انعام آتا بشخنگ و مقالہ و کتب سیرت و نعت و سیرت النبی ﷺکانفرنس اِرا اہم بشخ آتیا تالان مریک۔ برجاسال مقابلہ مقالات و کتب سیرت  ونعت نا پڑو فروری ٹی کننگاسس ہرانا سرحال ’’ملکی زرگزرانی سوگوی کن حکمت عملی، سیرت النبی ﷺ ءِ مون آ تخسا‘‘ ئس۔ یات سلے کہ مقابلہ مقالہ  وکتب و سیرت کن وزار ت ءِ ملوک آ غٹ مقالہ و کتاب آتےبنائی وڑاٹ وزارت نا کہول آ اسہ سکروٹنی کمیٹی شڑت وضابطہ نا رداٹ ہرک، دا ریسہ ٹی گچین مروک آ ہر کتاب و ہرمقالہ ءِ کم از کم 3 چاہندار آتیا تالان جج آتا کمیٹی ءِ سرجم جاچ وپڑتال کن مون تننگا، دا جج و ماہرین یونیورسٹی تا پی ایچ ڈی نا کہول انا پروفیسر مریرہ۔ اوکان پد دا ماہرآتا رپورٹ آتے اسہ بڑزکو کہولی ایپکس کمیٹی نا دوٹی تننگک، دا کمیٹی ہر کتاب و مقالہ ءِ ہندا رپورٹ آتے مون آتخسا ہرسا فیصلہ کیک کہ ہراکتاب ہراانعام نا حقدار ءِ۔ ہندا وڑ انعام یافتہ گوندنگوک آ کتاب و مقالہ سیرت نا تعین مریک۔ برجاسال مقابلہ کتاب و سیرت و نعت اکن 137 کتاب دوئی مس ہرافتیان انعام دوئی کروک آ خوش نصیب بندغ آتا کچ 31 ءِ وخت اس کہ 94 مقالہ سیرت دوئی مس ہرافتے ٹی انعام دوئی کروک آ بندغ آتا کچ 35 ءِ۔ دا سال کل 66 خوش نصیب بندغ انعام یافتگان آتیٹی اوار مریرہ۔ انعام دوئی کروک آتے یات گاری شیلڈ، سرٹیفکیٹ ونغد انعام تننگک۔ وزارت مذہبی امور آب اٹنگا مقالہ غاتے چھاپ کرسا مچ آ ملک انا جامعہ غاتا لائبریری و سیرت النبی ﷺنا سرحال آ پٹ وپولی ادارہ غاتے مفت فراوان کیک۔ سیرت النبی ﷺکانفرنس نا اِرا سیشن مریک، اولیکو سیشن اٹی مقالہ کتاب و سیرت و نعت نا سرحال آ مقابلہ غاتیٹی بشخ ہلوک آ اول ، دوم و سوم بروک آ مصنفین و شاعر آتیٹی انعام بشخنگک۔ وزارت مذہبی امور نا کنڈآن ہر سال سیرت کانفرنس اٹی ملکی و درملکی پنی آ مذہبی اسکالرآک بشخ ہلیرہ ہرانا مسخت عالم دین تا اسہ ایلو تون ملنگ آن فکری فاصلہ غاتے کم کننگ و اسہ ایلو ءِ پہہ مننگ نا موقع فراوان مریک و داڑان مذہبی ہم آہنگی، رواداری آ ہم جوان ءُ اثراس تمک۔ کانفرنس نا ارٹ میکو دے مرکزی دود اٹی سیرت النبی ﷺنا چندی پلوآتے تالان کننگک، سرحال نا رداٹ اسکالر و خطبہ چندی سرحال زرگزران نا تصوراتی پلو سیرت النبی ﷺءِ مون آتخسا، آسودہی زرگزران نا قیام سیرت النبی ﷺ ءِ مون آتخسا، زرگزران و معاشرت نا تعلق نا پلو سیرت النبی ﷺءِ مون آتخسا، زرگزران و اخلاق نا تعلق نا پلو سیرت النبی ﷺ ءِ مون آتخسا، زرگزرانی سوگوی ٹی ریاست نا کڑد پلو سیرت النبی ﷺ ءِ مون آ تخسا، زکواۃ و صدقہ غاتا زرگزرانی سوگوی ٹی کڑد انا پلو سیرت النبی ﷺ ءِ مون آتخسا، اسلام نا مثالی زرگزرانی نظام نا پلو سیرت النبی ﷺءِ مون آتخسا، زرگزرانی سوگوی کن بندغ آتا تعلیم و تربیت سیرت النبی ﷺ ءِ مون آتخسا، کسب معاش نا فضیلت و زرگزرانی سوگوی کن اونا اہمیت سیرت النبی ﷺ ءِ مون آتخسا، زرگزرانی سوگوی کن ڈٹ بندی نا اہمیت و گرج سیرت النبی ﷺ  ءِ مون آتخسا و زرگزرانی سوگوی ٹی زالبول آتا کڑد سیرت النبی ﷺ ءِ مون تخسا‘‘ گپ وتران کیرہ۔