اسلام آباد۔ 15 ستمبر (اے پی پی) نگراں وزیراعظم انوارالحق کاکڑ پارینے کہ گورننس ٹی گچینی کن سول ادارہ غاتا کارکڑد ءِ پدریسہ گچین کننگ انگ ءِ، بجلی دُزی، کوڑی کننگ و اسمگلنگ نا توننگ کن ہرچار آ صوبہ غاتیٹی گچین کاریم مننگ ءِ، ہراڑے گرج مریک فوج انا خذمت ءِ ہم دوئی کننگک، بجلی نا دُزی نا توننگ کن گام گیج آتے پین گچین کننگ نا گرج ءِ۔ داخیال آتا درشانی ءِ او جمعہ نادے آ بجلی دُزی، کوڑی کننگو اسمگلنگ نا توننگ نا بابت اڈ ہلوک دیوان نا کماشی ٹی گپ وتران کرساکرے۔ وزیراعظم پارے کہ نگراں حکومت گورننس نا بابت تینا زمواری تے ادا کننگ ءِ، کوڑی کننگ، کبینی و اسمگلنگ نا بابت صوبہ و تعلقدار ادارہ غاتون اواری اٹ حکمت عملی اس جوڑ کننگانے، مخلوق اٹی دا تاثر ئس کہ دا اسہ ہفتہ یا منہ دے انامہم ءِ ولے ای پیدوار کننگ خواوہ کہ دا ہفتہ اِرا ہفتہ نا ہیت اف، پاکستان نا اقتصادی جان جوڑی نا بابت گام گیج برجاسلک۔ وزیراعظم پارے کہ تدوک آ منہ دے آن کوڑی کننگ، کبینی، شرح مبادلہ و بجلی دزی نا بابت ہراگام گیج آتے کننگ انگ ءِ اوفتے پین گچین کننگ نا گرج ءِ ، تعلقدار و کانود نافذ کروک آ ادارہ غاک تینا کاریم نا بناءِ کرینو ، مہالو دا معلوم ہی الوکہ کہ دا دِناکاریم ءِ، دارجحان ءِ بدل کننگ نا گرج ءِ، بیوروکریسی، پولیس و تعلقدار ادارہ غاک اواری اٹ کاریم کیرہ و گورننس کن ہراڑے گرج مریک فوج اناخذمت ہم دوئی کننگک ہراکہ اسہ گچین و منظم ءُ ادارہ اسے، داڑتون اوار اوار سول ادارہ غاتا کارکڑد ءِ گچین کننگک ہرا وخت انا گرج ءِ، سول ادارہ غاتا کاریم نا کچ اٹی ودکی آن اوفتا کارکڑد و کڑد اٹی گچینی برساکیک۔ وزیراعظم ادارہ غاتے تینا اپروچ ءِگچین کننگ و وسیلہ غاتے کاریم اٹ اتنگ نا گرج آ زور شاغسا پارینے کہ ہرچار آ صوبہ غاتیٹی حکومتی گام گیج نا گچین ءُ بھرم اس مون آ بننگ ءِ۔
