اسلام آباد۔ 15 ستمبر (اے پی پی) نگراں بنجائی وزیر جان جوڑی ڈاکٹر ندیم جان پارینے کہ ڈینگی دین انا توننگ کن بنجا و صوبہ غاک شریداری اٹ گچین ومربوط حکمت عملی اس جوڑ کننگ ءُ ، وزارت جان جوڑی صوبہ ناجوڑی تا چٹفنگ کن ہرممکن گام گیج آتے پک کیک۔ داخیال آتا درشانی ءِ او جمعہ نادے آ تینا کماشی ٹی ہرچار آ صوبہ غاتیٹی ڈینگی نا حالیت آتیا جاچ دیوان آن گپ وتران کرسا کرے۔ اوپارت کرے کہ الس ءِ ناجوڑی تیان رکھ تخنگ کن مربوط گام گیج آتے پک کیر، کورونا دین نا آزموندہ غاتیان ہیل کرسا ناجوڑی تا چٹفنگ کن مربوط حکمت عملی اس جوڑ کنگے، ہیپاٹائٹس نا توننگ کن بنجائی و صوبہ غاک اواری اٹ اول سرآن پروگرام اس ترتیب ایتر۔ بنجائی وزیر پارے کہ ڈینگی نا توننگ کن اسہ نیشنل سٹریٹجک فریم ورک اس جوڑ کننگ اُن، وزارت جان جوڑی صوبہ ناجوڑی آتا چٹفنگ کن ہرممکن گام گیج آتے پک کیک۔ اوپارے کہ دیوان اٹی امنا کننگانے کہ مچ آملک اٹی دوائی تا بے سلنگ آن فراوانی و ہروڑنا چیلنج آتون مون تننگ کن گچین گام گیج آتے پک کننگک و مچ آملک اٹی ڈرگ لائسنسنگ نا بنا، لیبارٹری تا اپ گریڈیشن ، جعلی دوائی تا مارکیٹ آن چٹفنگ و ریکوری کن اسہ وڑپارت آ تالان اسہ جوان ءُ نظام اس جوڑ کننگ اُن ہرانا رداٹ ڈریپ غٹ صوبائی حکومت آتون اواری اٹ ایم اویو آ دستخط کیک۔ اوپارے کہ وزارت جان جوڑی گلوبل ہیلتھ سمٹ نانومبر اٹ اڈترفنگ ءِ، تاریخ اٹ اولیکو وار پاکستان گلوبل ہیلتھ سیکورٹی نا میزبانی ءِ کیک۔ اوپارے کہ پاکستانی الس و ادارہ غاتیکن داشرفمندی نا ہیت اسے ، اینو نن قول کین و بنجائی و صوبائی سرکڑدہ غاک اواری اٹ پاکستان نا الس ءِ رکھ کننگ کن عملی گام گیج آتے پک کینہ۔
