اسلام آباد۔ 15 ستمبر (اے پی پی) ملک اٹی براہ راست پیشن نا زرکاری ٹی برجامالی سال انا اولیکو اِرا تُو اٹی سالانہ بنداوتیا 16 درسد نا نموریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نار داٹ جولائی و اگست اٹی ملک اٹی براہ راست پیشن نا زرکاری نا کچ 234 ملین ڈالر ریکارڈ کننگا ہرا تدوک آ مالی سال اناہند امد انا مقابلہ ٹی 16 درسد زیات ءُ، تدوک آ مالی سال انا ہند امداٹی ملک اٹی براہ راست پیشن نازرکاری نا کچ 201 ملین ڈالر ریکارڈ کننگاسس۔ اگست اٹ ملک اٹی پیشن نا زرکاری نا کچ 146 ملین ڈالر ئس ہراتدوک آ سال اگست نا مقابلہ ٹی 15 درسد زیات ءُ، تدوک آ سال اگست اٹی ملک اٹی براہ راست پیشن نا زرکاری نا کچ 127 ملین ڈالر ریکارڈ کننگا سس۔ حساب وکتاب نا رداٹ برجامالی سال انا اولیکو اِراتُواٹی جم درملکی زرکاری نا کچ 260 ملین ڈالرریکارڈ کننگا ہرا تدوک آ مالی سال انا ہندا مد انا مقابلہ ٹی 48 درسد زیات ءُ، تدوک آ مالی سال انا ہندا مد اٹی ملک اٹی جم درملکی زرکاری نا کچ 176 ملین ڈالر ریکارڈ کننگاسس۔ اگست اٹ جم درملکی زرکاری ٹی سالانہ بنداوتیا 30 درسد نا نمومس۔ برجامالی سال انا اولیکو اِرا تُو اٹی چین براہ راست درملکی زرکاری کروک آ ملک آتیٹی سرفہرست ئس، جولائی و اگست اٹی چین پاکستان اٹ 50 ملین ڈالر نا براہ راست درملکی زرکاری کرے، تدوک آ سال نا ہندا مد اٹی پاکستان اٹ چین نا براہ راست درملکی زرکاری نا کچ 38 ملین ڈالر ریکارڈ کننگاسس۔ نیدر لینڈ 43 ملین ڈالر تون ارٹ میکو و سویٹزر لینڈ 36 ملین ڈالر تون مسٹ میکو نمبر آ ئس۔
