اسلام آباد۔ 15 ستمبر (اے پی پی) نگراں بنجائی وزیر حوالکاری و شینکاری مرتضیٰ سولنگی تون پاکستان نا اولیکو خلاباز زالبول نمیرہ سلیم اوڑدہی کرے و اودے 5 اکتوبر آ تیناخلائی سفر آ روانگی نا بابت تیاری تیان معلومدار کرے۔ نمیرہ سلیم خلاٹی پاکستانی بیرک ءِ بڑزکننگ نا عزم انا درشانی ءِ کرے۔ نگراں بنجائی وزیر حوالکاری نمیرہ سلیم ءِ خلائی سفر نا بناءِ کننگ آ حکومت پاکستان ، وزیراعظم و الس نا کنڈآن مبارکبادی پیش کرے و اونا سرسہبی کن نیک است خواہی نا درشانی ءِ کرے۔ داوخت آ گپ وتران کرسا نگران بنجائی وزیر حوالکاری مرتضیٰ سولنگی پارے کہ نمیرہ سلیم غٹ زالبول آتیکن رول ماڈل اسے، اونا سفر خلائی پٹ وپول اٹ پاکستان نا ودوک آ ساڑی گری نا علامت ءِ ہرا قوم اکن اہم سرسہبی اسے۔ مرتضیٰ سولنگی پارے کہ نمیرہ سلیم نا دا کوشست آن پاکستان نا امن پسند و شون پسند ملک انا حیثیت اٹ مثبت تشخص تالان مریک۔ اوپارے کہ پاکستان نا ورناچین زند انا چندی بشخ آتیٹی پاکستان نا پن ءِ دنیا ٹی بڑز کننگ کیرہ۔ یات سلے کہ نمیرہ سلیم اولیکو پاکستانی زالبول ءِ ہرادے قطبین آ سرمننگ نا شرفمندی ہم دوئی ءِ۔ نمیرہ سلیم 21 اپریل 2007ء آ قطب قطبی و 8 جنوری 2008 ء آ قطب سویلی ٹی پاکستان نا بیرک ءِ چست کرینے وخت اس کہ بروک آ تُو او خلائی سفر آ روانہ مننگ ءِ۔
