کوئٹہ۔ 15 ستمبر (اے پی پی)اسسٹنٹ کمشنر ظہور احمد بلوچ پارینے کہ جان جوڑی نا بشخ اٹی ڈیوالئی ءِ سگنگ پننگک، ڈاکٹر و عملہ نا غیرحاضری و لاپرواہی آ سخت کارروائی مریک ، انسانی جون تتون گوازی کروک آک رعایت نا حقدار افس۔ چیئرمین میونسپل کمیٹی ملک کلیم ترین پارے کہ ہسپتال اٹی مسہ دے ئی سفائی مہم بناکیک ، شاراٹی ٹریفک نظام تجاوزات آتے اینک کننگ و ایلو ویل آتیکن زوت پلان اس شین تننگک، سرجم حوال آتا رداٹ اسسٹنٹ کمشنر دکی ظہور احمد بلوچ چیئرمین میونسپل کمیٹی ملک کلیم اللہ ترین اناگت ڈی ایچ کیو ہسپتال نا دورہ ءِ کریر اسسٹنٹ کمشنر تحصیل لونی بیبرگ لہڑی ہم اوفتے تون اوار ئس داوخت آ او شعبہ حادثات OPDٹی بی سینٹر گائینی وارڈ نیوٹریشن سینٹر و چندی بشخ آتا معائنہ ءِ کرے وخت اس کہ ہسپتال نا بابت ایم ایس ڈاکٹر جوہرخان شادوزئی OPDڈاکٹر شیر افگن داریکا۔ گائینی وارڈ نا بابت ڈاکٹر فاطمہ اظہار نیوٹریشن سینٹر نا بابت ڈسٹرکٹ آفیسر اکبر خان لونی سرجمی اٹ حوال تسر ، داوخت آ اسسٹنٹ کمشنر ظہور احمد بلوچ پارے کہ جان جوڑی بھاز حساس ءُ بشخ اسے انتئے کہ انسان نا زند و مرک ہندا بشخ اتون تفوک ءِ، ہسپتال نا ڈاکٹر و نرسنگ و ایلو عملہ تینا فرض ءِ جوانی اٹ سرایتر و حاضری تے پک کیر الس ءِ جان جوڑی نا آسراتی و مسیحاجوڑ مرسا خذمت کیر غٹ بشخ آتے فعال کیر ملازم آتا غیرحاضری و ڈیوالئی ءِ سگنگ پننگک ،لاپرواہی آ سخت کارروائی مریک۔ وخت اس کہ چیئرمین میونسپل کمیٹی ملک کلیم اللہ ترین پارے کہ ہسپتال اٹی مسہ دے ئی صفائی مہم نا بناءِ کینہ ہراٹی میونسپل کمیٹی عملی پبی بشخ ہلیک و ہسپتال آن بے گرج بئے و بوچ وکچرہ تیان ساف کننگک تانکہ ہسپتال و ناجوڑ آتے ساف ستھرا گچین چاگڑد اس دوبرے، اوکان پد اسسٹنٹ کمشنر ظہور احمد بلوچ چیئرمین میونسپل کمیٹی ملک کلیم اللہ ئسک جیم کلب نا ہم دورہ ءِ کریر و جیم کلب اٹی چندی ورزشی مشینری تا معائنہ ءِ کریر و پاریر کہ جیم کلب ورناتے وردش نا کمک اٹ گچین جان جوڑ و تواناتخک و راجی برائی تیان تورک شار انا دورہ نا وخت آ اوفک نیوسبزی منڈی گارڈن روڈ زمان بازار عدالت روڈ ناناصاحب زیارت روڈ انا معائنہ ءِ کریر۔ چیئرمین میونسپل کمیٹی ملک کلیم اللہ ترین شار اٹی ٹریفک نظام ون وے ناروا تجاوزات ٹرانسپورٹ اڈہ شار انا تہہ ٹی سوزی و ایلو ریڑھی تا بابت سرجمی حوال تس اسسٹنٹ کمشنر ظہور احمد بلوچ پارے کہ شار آن ناروا تجاوزات آتا برخلاف گرینڈ آپریشن نا بناءِ کینہ ٹرانسپورٹ اڈہ غاتے شار آن پیشن گدریفنگ و ریڑھی بان تیکن شار آن پیشن جوان ءُ ہند اس تننگک و ٹریفک نظام و ایلو ویل آتیکن گچین پلان اس تیار کرسا عملدرآمد نا بناءِ کننگک۔
