گلگت۔ 13 ستمبر (اے پی پی) نگراں وزیراعظم انوارالحق کاکڑ پارینے کہ گلگت بلتستان نا الس نا ویل آتے کانودی نا عملداری و آئینی وڑاٹ اولیتی بنداوتیا ایسر کننگک، حکمت و ہمت اٹ غلط گمانی تے چٹفنگک، ملک اٹی اسہ قوم، اسہ کانود و بیرہ پاکستان نا نعرہ نا ہی گنجائشت ءِ، اگہ کس اسے کس اسے آن اومیت اس، خوش گمانی یا غلط گمانی اس ارے تو او اودے مر کے۔ داخیال آتا درشانی ءِ او چارشنبے نادے آ گلگت اٹی است انا مرض انا ہسپتال اٹی اوپی ڈی نا بناءِ کننگ آن پد صحافی تتون گپ وتران کرسا کرے۔ وزیراعظم پارے کہ گلگت بلتستان نا مخلوق بھلو مہرومریبت اٹ کنے بخیرکریر، الس نا کنڈآن ہراتینائی گری نا درشانی ءِ کننگا اودے ای اسُل است آن دپرہ، گلگت بلتستان چندی رنگ و نسل نا مخلوق نا گلدستہ ءِ ، اسہ ایلو نا حق ءِ بریبر امنا کننگ راج انا بنداو ءِ، قائد اعظم نا پاکستان کن ہراوژن ئس اونا عملی وڑ ننے گلگت بلتستان اٹی نظر بریک، اسہ ایلو آن جتا نقطہ نظر تخنگ آن پد ہم اواری اٹ زند ءِ تیر کننگ انسانیت نا معراج ءِ، اسہ ایلو نا حق انا شرف المی ءِ۔ حق انا نفاذ نا زمواری ریاست نا زمواری ءِ، اودے جوان وڑاٹ پورو کینہ۔وزیراعظم پارے کہ گلگت بلتستان نا الس کن ہندا کلہو ءِ ایسونٹ بسونٹ کہ نن اسہ ایلو نا حق انا شرف ءِ کین۔ اگہ کس اس دا تکک کہ داڑے ساڑی ایلمی ءِ نسخان تننگ کیک تو دااونا بھاز بھلو غلط گمانی اسے، او تینا غلط گمانی ءِ مرکے اگہ سوب اسے آن غلط گمانی ودی مسنے تو حکمت و ہمت اٹ اوفتے مُر کننگک۔ اوپارے کہ گلگت بلتستان نامخلوق نا حوصلہ مش تیانبار بڑز ءِ، گلگت بلتستان نا مخلوق نا نیام اٹ ہرامہرومریبت ءِ اونا سوب آن مچ آ دنیا غان سیل و سواتی دا علاقہ غا بریرہ۔ وزیراعظم پارے کہ داجاگہ نا ہرا آئینی باندات آک ءُ اوفتیا ہم گورنر، وزیراعلیٰ، کابینہ نا باسک آک و ایلو تعلقدار فریق آتون سرجم گپ وتران مسنے، گلگت بلتستان نا ویل آتے ہرممکن حداسکان ایسر کننگ نا کوشست کینہ، تانکہ داجاگہ نا مخلوق تینا نت تیا سلر و اسہ جوان ءُ زند اس تیر کیر و اوفتا شناخت نا بابت ہراسوج آک ءُ اوفتا ہم زوت آئینی ورندی ملک، دا بابت بنجائی حکومت انتس کہ کننگ کرے ، کیک۔ وزیراعظم پارے کہ گلگت بلتستان اٹی سیل وسوات، معدنیات، توانائی تون اوار ایلو اقتصادی وارخواہی آن فائدہ ہرفنگ کن مریس مد حکمت عملی اسے آ کاریم کننگک۔ اوپارے کہ گلگت بلتستان اٹی سڑک آتا بنداوی پنجر ءِ گچین کننگ بنجائی حکومت نا اولیت آتیٹی اوار ءِ۔ سپریم ایپلٹ کورٹ اٹ جج انا تعیناتی نا بابت اسہ سوج اسےنا ورندی ٹی وزیراعظم پارے کہ دا بابت زوت خوشخبری اس ایتنہ، تعیناتی کن ہچ وڑنا بولی اس لگپک، نن بولی خلنگ کن آخا بولی تا چٹفنگ کن بسونن، قراقرم یونیورسٹی نا مالی باندات آتے ایسر کننگک۔ وزیراعظم پارے کہ پاکستان نا تہہ ٹی بیرہ پاکستان نا انٹیلی جنس ادارہ غاک ہی کاریم کننگ کیرہ اوکان بیدس پین ادارہ سے نا ہچ ءُ گنجائشت اس اف، پاکستان اٹ بیرہ اسہ قوم ، اسہ کانود و بیرہ پاکستان نا نعرہ نا ہی گنجائشت ءِ اگہ کس اسے کس اسے آن اومیت، خوش گمانی یا غلط گمانی ارے تو اوفتے مرکے۔ اسہ پین سوج اسے نا ورندی ٹی وزیراعظم پارے کہ گلگت اٹ پی ٹی وی نا بیورو آفس نا جوڑ کننگ و پی ٹی وی آ شینا و بلتی زبان اٹی ٹاک شوز بناکننگ کن پارت جاری کننگانے تانکہ داجاگہ نا سیاسی، زرگزرانی و ایلو ویل آتے تالان کننگ مرے۔
